Champhai-ah lungphum phum

Champhai khawpui chhunga sawrkar in hma a lakna tur Project pathum atan nimin khan Minister Lalnghinglova Hmar chuan lungphum a phum.

Nimin-a lungphum phum tak te hi Heritage & Cultural Center (Champhai Vengsang), Eco Resort Experience at Keilungliah leh Construction of Artificial Turf (New Champhai) te niin Heritage & Cultural Center leh Eco Resort Experience at Keilungliah hi Tourism Department hmalakna niin Swadesh Darshan 2.0 hnuaia hmalakna a ni a, Eco Resort Experience-ah hian Cottage te, naupang infiamna hmun te leh khualzin mamawh hrang hrang siam a ni dawn a, Heritage and Cultural Center-ah hian Multipurpose Hall te, Lounge te, Meeting Room te siam a ni ang. Construction of Artificial Turf hi Ministry of Tribal Affairs hnuaia PMJVK Scheme hmanga Sports & Youth Services hmalakna a ni a, inkhelhna mual tha tak siam a nih dawn bakah mipui thutna tur Pavillion te, hungna te leh inthlakna leh inthiarna hmun tha tak tak siam tum a ni.

Champhai Kahrawt-a Thangtea Hall-a hemi puala hun hman ah Minister Lalnghinglova Hmar chuan heng lungphum te hi sawrkar hmalakna a nih rualin sawrkar chu a puitu tur niin a thawktu ber leh hlawkna teltu ber chu mipui an ni tih a sawi a. Heritage & Cultural Centre chuan Meeting hmunhma tha tak a nei ang a, Conference hman nan mi tam takin an hmang dawn tih a sawi a. Vantlang mipuite a enkawlna leh venhimna kawngah pui turin a sawm a. Eco-Resort at Keilungliah pawh khualzin tam tak tan ei leh in leh riahna hmun tha tak a awm belh phah anga, Champhai-ah mi a hip belh ngei a beisei thu a sawi a. Champhai mipuiin khualzin dawnsawn dan an thiam chhoh a ngai dawn hle a, theih ang anga inzir turin mipuite leh khawtlang hruaitute a fuih a ni. Champhai-ah hian District Tourism Office hawn a nih dawn thu leh Champhai Tourist Lodge chu siamthat tur thu a puang bawk.