Bangladesh-a Sentut leng vangin hmalak mek a ni

Mizoram thenawm Bangladesh-ah Sentut (Measles) leng mek nia hriat a ni a, hei vang hian he natna leng mek laka Mizoram a him theih nan inbuatsaihna kalpui mek a ni.

Sawrkar in thuchhuah siama a tarlan danin tunhnaiah Measles (Sentut) hri kan tih mai hi Bangladesh-ah a darh mek a, kumin January atanga April thla tir thleng khan mi 5792 zet te chuan he natna hi an vei ni a rinhlelh (suspected case) ni tawhin mi 94 in an thihpui tawh nia tarlan a ni a. India ramah pawh ramri hnaih a awm State -West Bengal, Assam, Tripura leh Mizoram-ah te pawh he natna hri vei hi an pung chho mek nia tarlan a nih avangin sawrkar chuan mipuite chu fimkhur tura chahin, mipuite chu he natna laka an him theihna tura an zawm tur hrang hrangte pawh a tichhuak a ni.

Lawngtlai-ah chuan nimin khan Bawrhsap Donny Lalruatsanga hovin he hri leng chungchangah hian sawrkar mi pawimawh te an thukhawm a. he hunah hian Sr. Chief Medical Officer, Dr. Lalmuanawma Jongte chuan Sentût (Measles) leng mek laka lo inrâlrin dan tur sawiin, Vaccine lak that chu invenna tha ber a nih thu leh 95% aia tam MR Vaccine la ngei tura hmalak a tul thu a tarlang a. Vaccine chu naupang (9-12 months) leh (16- 24 Months) hnenah pek thin a ni a, dose hnih pek thin a nih thu a sawi a. Sentút chu Measles Virus-in a thlen thin tih sawiin, boruak ah a leng thei tih hriata fimkhur a tul thu a sawi a. Sentût laka lo inven nan chak zawka Surveillance kalpui a nih tur thu sawiin, PHC leh CHC-ah Rapid Response Team tih nun vek tawh niin Mobile Vaccination Team-te pawh an inralrin tawh thu a sawi bawk.

He hunah hian Dr. Lalhlimpuii, WHO chuan an hmalak dan tlangpui tarlangin, Lawngtlai District-ah nikum January leh February thla ah Sentût a lo puang ve tawh tih a sawi a, theihtawp chhuah a nih angin nunna chân an awm lo tih a sawi a. Vaccine la kimlo an awm thin tih tarlangin, hemi kawngah hian chak zawka hmalak mek a nih thu a sawi a. Kumin bikah Sentût vei an awm lo tih tarlangin, theih ang anga hmalak chhunzawm zel a ni ang, a ti a. Dr. Remlalnghaki, DIO chuan April 2025- March 2026 chhunga nuapang kum khat hnuailam R1 lak a that viau laiin, MR2 la an tlahniam hle tih a sawi bawk.

Hetihlai hian Zawlnuam PHC-a Medical Officer chuan he natna avang hian State thenawm Assam leh Tripura lamah ramri kan in thil pawimawh ni lovah chuan kal rihlo turin mipuite a chah a, Naupang, a bikin kum 2 hnuailam leh vaccine la tha lo te chu ramri pelin State dangah hruai lo turin a chah bawk a. Kawrthah-a Village Council pathum - Kawrthah, Kawrthah South & Kawrthah North te pawhin thuchhuah intawm siamin khawtlang mipuite chu an thenawm State, Tripura/Damcherra area lama kal lo turin an ngen bawk.