AMC Inthlanpui neih tur atan inbuatsaih mek zel

Aizawl Municipal Council (AMC) Inthlanpui neih tur atan ngawrh taka inbuatsaihna kalpui mek niin he inthlanna a Duty turte pawh ruat fel an ni tawh.

Tun thla ni 21-a AMC Inthlanpui neih tur atan hian nimin khan Aizawl DC Meeting Hall-ah AMC General Election-a General Observer atana ruat Lalnunhlua, Additional Secretary, Agriculture & Farmers Welfare Department leh Recognized political party 4: INC, BJP, MNF leh ZPM aiawh te telpuina hnuaiah AMC,2026 inthlanpuia Polling Official tur; Presiding Officers leh Polling Officers te randomization programme neih a ni a, Election Officer bakah Municipal Returning Officer (MRO) leh Assistant Municipal Returning Officer(AMRO) te pawh he randomization programme-ah hian an tel a ni.

AMC hnuaiah hian Ward 19 awmin heng Ward 19-ah hian inthlanna hi neih a ni dawn a, Ward 19 zinga Ward 6 (paruk) hi hmeichhe tana hauh niin Local Council 89 leh Polling Station 264 a awm mek a. Tun tuma inthlanna neih turah hian Polling Official hman theih tura awm te hi PRO atan 330, PO-I atan 330 leh PO-II atan 329 an ni a. Heng atang hian nimin-a 2nd Randomization-ah hian Polling Station 264-a duty tur PRO 264, PO-I 264 leh PO-II 264 leh Ward tin tan Reserve 20% nen Computer chuan a thlangchhuak (randomized) a. Polling Team pakhat-a awm tur PRO leh PO-I leh PO-II te herchhuak (randomized) lehin, chung Polling Team te chu Ward 19-ah a semdarh (randomized) leh ta a ni.

Ruahman lawk dan chuan tunkar Inrinni khian Final Randomization neih leh tur a ni a, hetah hian Ward tin a Polling Team te chu Ward tin chhunga an duty na tur Polling Station theuhva Computer hmanga semdarh (randomized) leh an ni ang.

Hetihlai hian AMC Inthlanpui neih turah hian Home Voting chu nimin thleng khan kalpui a ni a, Home Voting hi kum upa, damlo natna khirh bik nei leh pianphunga rualbanlo, Polling Station pan thei lo ten vote an thlak theihna tura ruahman niin hriat theih china vote thlak upa ber chu kum 108 mi, Nokungi, College Veng niin Ward No. XVI-ah Vote a thlak a ni. Tun thla ni 21-a AMC General Election 2026 neih tura tih tur tul hrang hrangte chu SEC in tluang takin ruahmanna a kalpui mek a. April 13 atang khan Home Voting hi kalpui hriat theih chinah mi 1,986 in vote an thlak tawh a, Home Voting nei tura inziaklut zat atanga chhutin 71.77% in vote hi an thlak tawh a ni.

Ruahman lawk ang chuan Home Voting hi Vawiin thleng hian kalpui a ni dawn a, Home Voting hi AMC Ward 19-ah kalpui vek tur niin Ward tinah Home Voting Team pakhat theuh awmin, Home Voting ti tura dilna lut zat hi 2769 a ni.