The Mizo Marriage and Inheritance of Property (Amendment) Act-a rawtna lut te thlirho a ni

Mizo Inneih leh Rokhawmna Dan siamthatna - The Mizo Marriage and Inheritance of Property (Amendment) Act chungchanga rawtna hrang hrang awm te chu nimin khan Review Committee chuan an thlirho.

Mizo Inneih, Inthen leh Rokhawmna Dan ennawnna Review Committee hi nimin khan Chief Secretary Conference Hall-ah an Chairman leh Law & Judicial Department-a Addl. Secretary Zahmingthanga Ralte hovin an thukhawm a. Mizoram Legislative Assembly Session hnuhnung berin a pass tak, Mizo Inneih leh Rokhawmna Dan siamthatna - The Mizo Marriage and Inheritance of Property (Amendment) Act chuan Mizoram mipuite zingah ngaihdan hrang hrang, a thlawp zawng leh sawiselna lam te a piang a. Mizoram Sawrkar chuan heng ngaihdan leh sawiselna awm te hi a dik leh dik lo te zirchianga, engtia kalpui tur nge tih uluk taka zir tura a tih angin Review Committee thutkhawm hi neih a ni a. Nimin-a thutkhawma ngaihtuah zingah hian MHIP General Headquarters-in Assembly Speaker hnena an lungawilohna leh en tha tura an ngenna lehkha te, Val Upa Council-in Chief Minister hnena en that an ngenna leh rawtna an thlen te pawh a tel a ni.

He thutkhawm ah hian an Chairman Zahmingthanga Ralte chuan sawiselna leh ngaihdan hrang hrang te chu uluk takin zir a nih thu sawiin, a then chu thil niawm tak nia a lan laiin, tam tak sawiselna erawh thil hriatchian tawk loh vang a nih thu a sawi a. The Mizo Marriage and Inheritance of Property (Amendment) Act, 2026 chu Mizoram Gazette-ah March ni 6, 2026 khan chhuah niin hemi ni atang hian hman nghal a ni tih sawiin, “Kohhran hrang hranga Inneihna kawltu zawng zawngin an hriat tur chu, he Dan hnuaiah hian nupui pasal then tawhin midang an neih leh dawn chuan Court atangin Divorce Certificate an neih ngei ngei a ngai a, chutiang nei lova nupui pasal dang nei chu BNS Sec.82 angin kum 7 thleng lung In tan leh pawisa chawia hrem theih an ni dawn,” tiin fimkhur taka inneihna kalpui turin a chah a ni.

Nimin-a thukhawmah hian Mizoram Kohhran Hruaitute Committee (MKHC), Council of Churches in Mizoram (CCM), Mizo Language Development Board, MHIP Headquarters, MUP Headquarters, Women Commission, Bar Association bakah mi thiam leh tui mite an tel a. Chairman chuan Meeting a telte hnena lawmthu sawiin, Mizo chhungkaw tin leh mimal tin khawih thil ngaihtuah a nih avangin fimkhur leh uluk taka ngaihtuahna seng turin a chah a, Meeting neih leh huna thutlukna tha tak siam thei turin Member te a chah bawk a ni.