North Eastern Regional Power Committee (NERPC) Meeting vawi 31-na Aizawl-ah neih a ni

North Eastern Regional Power Committee (NERPC) Meeting vawi 31-na chu nimin khan Aizawl Falkland-a KTP Youth Recreation Centre-ah neih niin Energy-a intodelhna tur te, kawlphetha leh infrastructure lama hmasawnna tur chungchangte sawiho a ni.

NERPC Meeting vawi 31-na ah hian Mizoram P&E Minister F. Rodingliana chuan NERPC Meeting hi Mizoram-in a vawi khat thlenna a nih thu leh lawmawm a tih thu sawiin, Power & Electricity lama Mizoram hmasawnna te tarlang a. Mizoram chu Ministry of New & Renewable Energy-in tunhnaiah North East-a che tha ber pawl (Best Pperforming States) zingah a puan thu sawiin, hman tangkai loh hausakna (untapped wealth) a neih hnem thu te, CWC Survey Report-ah pawh Hydro Power MW 3,660 siamchhuah theihna a neih thu te, Pumped Storage Project (PSP) ah pawh MW 10,000 aia tam siamchhuah theihna a neih thu te leh NISE Report-ah pawh tarlan a nih danin Nizung chakna atangin GW 9.09 siamchhuah theihna a neih thute a sawi bawk a. Heng theihna nasa tak Mizoram-in a neihte hi a taka tharchhuah a nih zel theih nan hmalak mek zel a nih thu sawiin, thawhhona tha a ngaih pawimawh thu a sawi bawk.

NERPC hi India hmarchhak State 7 te'n Power Supply hnianghnar leh rintlak an neih theih nan Electricity Act, 2003 hnuaia din a ni a, nimin-a Meeting vawi 31-na an neih ah hian NERPC Chairman leh Meghalaya Power Minister Metbah Lyngdoh pawhin North Eastern Region hote Transmission & Distribution Loss sang lutuk chu a ngaimawh thu sawiin, India ram average ai maha kan san thu leh tan kan lak nasat a ngaih thu a sawi a. Hei bakah hian hmasawnna hna thawh nana Forest hman man/tih chereu man Net Present Value – NPV charge sang lutukin NE State, Forest cover tamna ramte tan hmasawnna hnathawh a tih thuanawp nasat thu sawiin, NPV senso hi Central sawrkarin a tum emaw, a nih loh leh ramngaw neih tam dan azir emaw a he chawi tur bituk hi tihhniam nise tiin a rawt bawk a ni.

NERPC Meeting vawi 31-na ah hian hma lak ho theihna dan tur hrang hrangte rel niin India hmarchhaka ramngaw leh tui chakna te chu hlawk tak leh dik taka hman a nih theih dan turte sawiho a ni bawk.