Lammual ram-ah sawrkar in kut a thlak tan dawn

Urban Development & Poverty Alleviation Department changtu Minister K. Sapdanga'n karleh Thawhlehni, March ni 17 atangin Aizawl Treasury Square leh Bazar Bungkawn inkar kawngpui chu feet 50 vela zauin laih tlang phei tur a nih thu a sawi.

Nimin-a Assembly Budget Session zawhna leh chhanna hunah UD&PA Minister chuan Chief Minister kaihhruaina hnuaiah AR chhuahsan ram humhalh leh tangkai taka hman dan tur ngaihtuahtu Advisory Committee din a nih thu a sawi a, chutah chuan Party hrang hrang leh NGO aiawh, Social Actitives aiawh leh Kohhran aiawhte pawh an tel tih a sawi a. AR chhuahsan ram kut an thlak tura pawimawh ber leh mipui nghahhlelh ber chu kawngpui tihzauh nia a lan avangin karleh Thawhlehni, March ni 17 zing dar 7:30 atangin Treasury Square leh Bazar Bungkawn inkar kawngpui awmsa chu inrual tlang phei patin, feet 50 vela zauin laih tlang phei tur a ni dawn a, chu chuan lirthei tawt lutuk a chhawk zangkhai tura a rin thu a sawi a. Hemi atan hian cheng vbc. 153.56 dah a nih thu Chief Minister Lalduhoma chuan a lo sawi tawh a ni.

UD&PA Minister chuan AR hmun hluiah hian hmanlai hmun ngaihhlut Heritage Value nei chi hrang hrang a awm thu sawiin, Quarter Guard leh Loch House tih loh Heritage Value tak tak nei te lo chu thiah tura ruahman a nih thu a sawi a. Mandir pawh suanchhuah a ni dawn tih sawiin, hemi hmunah hian vantlang mipuite tan Public Park siam a ni dawn a, Lammual Grass phah pawh Artificial Grass tha ber chi in thlak tum a ni a. AR Cinema Hall hmunah chhawng li vel a sangin Car sang tel lenna Parking lot siam tum a ni a, chumi chungah chuan mi 2000 vel lenna Hall bakah mi 500 vel lenna Hall engemawzat sak tum a ni a, Hall pui ber chu Vanapa Hall hming put tir tum a nih thu sawiin, Vanapa Hall awmsa chu hmanna tangkai dang zawn a ni dawn tih House chu a hrilh bawk.