High School Academic Calendar sawihoin ruahmanna siam

Nimin khan School Education Minister Dr. Vanlalthlana hovin a Pisa-ah Education Department Official ten High School Academic Calendar chungchang an sawiho a, School Calendar tur pawh duan nghal a ni bawk.

He thutkhawm ah hian Mizoram Education Reforms Committee thutkhawm vawi 14-na leh 15-na rawtna chu zirho in an ngaihtuah a. Kum 2026-2027 High School Academic Session chu April ni 1, 2026 (Nilaini)-ah tan nise tiin a rel a. First Term Exam leh result puan chu July ni 7 atanga July ni 17, 2026 chhunga peihfel hman tura tih a ni a. Second Term chu July ni 21, 2026-a tan tura tih niin Exam leh Result puan chu October ni 19 atanga October ni 30, 2026 chhunga peihfel tura tih a ni.

Hei bakah hian Third term hi November ni 3, 2026-a tan tura tih niin December ni 21, 2026 atanga January ni 5, 2027 inkar chu Thlasik chawlh atana tih a ni a. Third Term Exam leh result puan hi January ni 18, 2027 atanga January ni 29, 2027 chhunga tih fel tura rel a ni bawk a. HSLC Examination chu February 2027 chhunga buatsaih nise tih a ni a. Higher Secondary School chu a ngai anga kal tura rel tawh sa niin April ni 1, 2026-ah class kal tan tur a ni.