Mizoram Universal Health Care Scheme 2.0 leh MUHCS Call Centre te Chief Minister in a hawng
Mizoram Legislative Assembly House Session chhun chawlh laiin nimin khan Assembly Annex Conference Hall-ah Mizoram Universal Health Care Scheme (MUHCS) 2.0 leh MUHCS Call Centre hawnna hi neih niin Chief Minister Lalduhoma chuan, Mizoram Universal Health Care Scheme (MUHCS) chuan kum hnihna alo chuankai tak thu leh tluang taka he Scheme a kal theih nana tha leh zung sengtu zawng zawngte leh MUHCS zawmtu Hospital-te chungah lawmthu a sawi a. “MUHCS kum khatna kha uluk takin kan zir a, sum leh pai pawh kan seng nual a. Nimahsela mipuite tana a thatzia kan hmuhin sum leh pai senso hi tam tham deuh mahse insen zel kan huam. Tun budget tharah hian cheng vbc. 130 kan dah a, sawrkar hnathawk contribution hi cheng vbc. 26.42 vel a ni a, Asian Development Bank atangin cheng vbc. 800 chuang kan puk bawk a. MUHCS 2.0 hi a hma aia tha zawka kalpui kan tum a ni,” a ti.
MUHCS-a inziah luh hun hi April ni 15, 2026 thleng hawn tur niin May thla ah khar a ni ang a, June thlaah thla khat chhung ‘Grace period’ hawn leh a ni anga, Grace period-a inziahluhna man erawh chu hun pangngaia inziahluh man aiin zaa sawmnga (50%) in a sang tawh dawn a. Hemi chungchang hi Chief Minister chuan sawiin, “Mipui ten inziahluhna hun hawn mek hi bawh pelh lo ila, hun bituk pawn lamah inziahluh theih a nih loh avangin a hunbi hi ngaipawimawh ang u,” a ti a. MUHCS an kalpui mek danah emergency emaw, nunna atana hlauhawm enkawlna pek kawngah Empanelled damdawi In ni lova inenkawl theihna (provision) siam a nih thu sawiin, “He dan hi kan ennawn a MUHCS 2.0 ah hian khauh zawka kalpui kan tum,” a ti a. ICU-a admit nghal ngai damlo te; Nunna chhan nana zai nghal ngai damlo leh Accident vanga zai nghal ngai damlo te chauh MUHCS hnuaia Emergency/Life threatening provision-in a huam tawh dawn thu a sawi bawk a ni.
Chief Minister hian Mizoram State Health Care Society te fakin, “Mizoram State Health Care Society hian February ni 18, 2026 khan International Organization for Standardization (ISO) Certification a hmu a, he Certification hi Office inrelbawlna tha leh mipui tana service tangkai pek kawnga hmasawnna lawmawm tak a ni. Hei mai bakah hian Mizoram chuan National Health Authority hnen atangin January, 2026 khan AB PM-JAY hnuaia Beneficiary enrolment-ah Best State nihna chu State dang pali (4) rualin a lo dawng tawh bawk. He lawmman hian Mizoram chhunga Golden Card nei thei chhungkaw 2,16,584 zinga chhungtin atangin member pakhat talin Golden Card an siam tawh tih a entir a ni,” a ti.
April ni 1, 2026 atanga kalpui tur MUHCS 2.0 hawnna hunah hian Khual Zahawm, Health Minister Lalrinpuii chuan Universal Health Care Scheme kalpui a nih dawn khan an huphurh thu leh tluang taka an kalpui thu a sawi a, “Mipuite pawhin a thatzia an hre chho zel a. Kan lawm hle a ni. Kan kalpui tawh china phai lama kan refer te hi kan rama kan enkawl theih rih loh natna te an ni hlawm a. Refer tur reng reng hian Medical Refer Board an kaltlang zel a, Refer Board pawh kan fimkhur a tul hle. MUHCS 2.0 hi tha lehzuala kalpui kan tum a, mipuiten ngaihven tha ila, a hun takah inziaklut vek ila kan duh a ni,” a ti bawk.
MUHCS 2.0 hawnna inkhawm hi Health & Family Department Commissioner & Secretary K. Lalrinzuali IAS chuan a kaihruai a, Minister leh MLA te an tel a ni.
Comments
Post a Comment
I ngaihdan i sawi hian mipui ngaihdan i tarlang a ni!