MIDH Scheme hnuaiah Sapthei chin uar a ni; Sawhthing chin chungchang zirchianna kalpui tum

Horticulture Minister C. Lalsawivunga chuan kum 2025 chhung khan Mission for Integrated Development of Horticulture (MIDH) Scheme hnuaia Special Intervention leh Area Expansion Scheme-ah ram hectare 550-a zauah Sapthei chin thar a nih thu a sawi.

Nimin-a Assembly Session zawhna leh chhanna hunah Member te zawhna chhangin Horticulture Minister C. Lalsawivunga chuan Horticulture Department-in Sapthei ch$n pun lamah nasa taka hma a lak thu a sawi a; kum 2025 chhungin ram hectare 550-a zauah Sapthei chin thar a ni a, chungte chu Aizawl District-ah hectare 34, Khawzawl District-ah hectare 316, Champhai District-ah hectare 150 leh Serchhip District-ah hectare 50 a nih thu a tarlang.

Sawhthing chungchanga zawh belhna chhangin Minister chuan, kumin atangin Horticulture Department-in leilung tichhe lo thei ang ber leh a hmun ngaia hun rei zawk Sawhthing chìn theih dan zirchianna District tinah kalpui tum a nih thu a sawi a, “District tinah hmalakna kalpui a ni a, DHO tinah inelna kalpui ni, a titha ber thlan a ni anga, lawmman awmze nei tham pek tum a ni,” a ti a. Leilung tichhe lo thei ang bera Sawhthing chìn dan tur zirchiannaah hian, tlangram âwihtlân-ah chuanchung sang lamah Chàngkham Technology hman a ni dawn a, chuanhnuai âwih dam chinah Terrace Cultivation tih tum niin Phai chinah lei rihpàwn-a chin tum a nih bakah thlai dang nena chìn chhâwk leh chìn pawlh dan zirchian a ni ang tih te a tarlang bawk.

Sawhthing, Aieng leh Mizo hmarcha-ah Horticulture Department-in nasa taka hma a lak thu Horticuoture Minister chuan sawiin, “Sawhthing tihrona khawl Mizo pa kutchhuak, Tapchhak Technology leh Rapchung Technology hmanga Lalpiangliana, Sailo Machineries leh HV Lalzuimawia, Lalzui Research Foundation te siam enchhin a ni a, kan mithiamte'n phai lama an siam aiin a tha zawk niin an ngai,” a ti a; Sawhthing zai lêp nan Tapchhak technology khawl 60 sawrkarin a lei tawh thu leh Sawhthing phorona atan Rapchung technology khawl lei tura an inbuatsaih mek thu a sawi a. Champhai leh Hnahlana Grape chìnte chu a upat tawh avangin tinulât thar a ngaih thu sawiin, “Special Intervention Scheme hnuaiah rejuvenation kalpui a ni a, Champhai District-a Grape chingtu chhungkaw 360 hnenah Intervention Scheme hnuaiah rejuvenation kalpui a ni,” a ti bawk.