Inremna atana mawhphurtu nih ngamna leh a tul anga thupha chawi ngam a pawimawh tih sawi

Chief Minister Lalduhoma chuan, “Inremna atana thil pawimawh tak chu a mawhphurtu nih ngamna leh a tul anga thupha chawi ngamna hi a ni,” a ti.
Nimin-a Chapchar Kut 2026 Aizawl Lammual-a hman chu Chief Minister Lalduhoma chuan Kut Pa nia hmanpuiin Khawvel hmun hrang hranga awm Zofate Kut chibai bukin, Hlim taka hmang theuh turin duhsakna a hlan a. Chief Minister chuan kan pi leh pute khan Chapchar Kut hi hlim taka hman ngei an tum thin avangin tumah an inhau duh ngai lova, inremna hunah an hmang thin tih sawiin, “Vawiin a kan thupui ‘Zo nun ze mawi - Inremna’ hi Chapchar Kut nen a inhmeh em em a ni,” a ti a. “Inremna hi kan Lal leh an Upate pawh khan an ngaihlu a, ro an relna tinrengah ‘Chalrem’ leh ‘Saui tan’ dan hi thiam takin an hmang fo thin. Inremna atana thil pawimawh tak chu a mawhphurtu nih ngamna leh a tul anga thupha chawi ngamna hi a ni a. Kan thiam lohna leh fel lohna te ah midang puhmawh lova 'Ka thiam loh a ni e, ka mawh a ni e' tih ngamna hian inremna te, damnate a thlen thin. He Kut atang hian mawhphurhna la ngam turin i huaisen thar ang u,” a ti bawk.

Chief Minister chuan Inremna a awm theih nan Social Media-a kan thu post leh comment te pawh fimkhur tura chahin, “Politics thila ‘Lim inhalsak’ te hi kan hnamzia a ni lo. Rorelna hmunah tawngkain inkhak bawrh bawrh mah ila kan inhaw zui ngai reng reng lova. Inngeih takin kan inkawm zui leh mai thin. Inremna Kut kan hmang a ni tih hriain Vawiin atang hian mi zawng zawngte inrem thar leh ang u,” tiin mipuite a sawm a ni.

Aizawl-a Chapchar Kut hmanna ah hian Ku Thlengtu leh Art & Culture Minister C. Lalsawivunga chuan thuhma sawiin, Central YMA President, R. Lalngheta chuan inlawmna thu sawiin, “Hnam-a min dintu Pathian in kan hnam tana ni ropui min buatsaih sak Chapchar Kut kan thleng leh thei hi a lawmawm a. He Kut hi i uar deuh deuh ang u,” a ti bawk.

He hunah hian Chief Minister chawimawina Nopui semchhuah niin Esther Hnamte, Lunglei (Artist); Lalhmingmawii, Chaltlang (Lemziak thiam, Award tam tak lo dawng tawh); Henry Lalhmingmuana, Lawngtlai-III (Auto Rickshaw Driver, a passenger-in a motor-a cheng nuai 17 a theihnghilh chu kim taka petu); VL Bela, Electric Veng, Aizawl (Zotheihuan siamtu, kum tam tak chhung nungcha humhalh zirtirtu) leh John Lalrinchhana Jahau, Khuangleng, (Entreprenuer) te hnenah pawisafai Rs. 1,00,000 leh Citation pek an ni a. Kumin Chapchar Kut hi hetiang chawimawina Nopui pekchhuah tum khatna niin Fai intihsiakna lawmman te, Mizoram Bana Kaih hnuaia CM Special Award te pawh sem a ni a. Central YMA kaihhruaina hnuaiah Cheraw kanpui leh Khuallam entir niin Pipu zai te, lam chi hrang hrang te, Mizo infiamna te, Thingdim lemchan te, Pawnto te entir a ni a. Pang Cultural Troupe ten Thla Koh an entir bakah NEZCC aiawh Meghalaya leh Sikkim Troupe ten an hnam lam an entir bawk.