Furniture Workshop neitu te zawm tur inkaihhruaina siam

Serchhip District Magistrate chuan Serchhip District-a Baktawng leh Chhuanthar Tlangnuam huamchhunga Furniture Workshop nei te zawm turin thupek a tichhuak.
Hemi chungchanga Ser-chhip District Magistrate, Paul L. Khuma’n thupek a tihchhuah ah chuan Baktawng leh Chhuanthar Tlangnuam huamchhunga Furniture Workshop-te atanga thingnawi leh rawng kahna khu te chuan mihring hriselna a nghawng bakah vantlang tan harsatna a thlen thu dawn a nih thu tarlangin, inkaih-hruaina zawm nih theih nan in hrilhhriatna leh puan-zarna pawh neih ni tawhin, hetiang sumdawnna leh eizawnna ten mihring hriselna atana harsatna an thlenin emaw, vantlang tana harsatna an thlen a nih chuan chutiang khapna leh khuahkhirh theihna chu District Magistrate hnenah pek a nih thu a tarlang a ni.

Serchhip District Magistrate chuan Section 152 (b) of BNSS, 2023 in thuneihna a pek angin Baktawng leh Chhuanthar Tlangnuam huam chhunga Furniture Workshop nei zawng zawng ten an zawm vek tur thupek tarlangin, Kawng sira thing zai, thing nawh, rawng kah te khap tlat a nih thu te; Kawng sirah Vangtlang tana hnawksak turin bungrua heng - Thing leh hnathawhna hmanrua te dah/chhek loh tur a nih thu te; Rawng kap leh thing nawt ten an Workshop atanga hnathawhna khu a chhuah loh nan inzarphui tur niin hnathawkte pawhin Mask vuah zel tur a nih thu leh Hnathawna khu te pawnlama a chhuah loh nan rang taka vacuum cleaner emaw, hmanraw dang hmanga thenfai zung zung tur a nih thu te a tarlang a. He thupek hi thla ruk (6) huam tura tih niin Inkaihhruaina dan zawm lo te chu Section 223 of Bharatiya Nyaya Sanhita, 2023 dan hmangin kum khat (1) thleng lungin tan emaw, Rs. 5,000/- thleng chawitir emaw, a pahnih hmang pawhin hrem theih a ni ang.

Hetihlai hian nimin khan Chhuanthar Multipurpose Hall-ah Health Department chuan mipui te hriselna atana thil pawimawh hrang hrang inzirtirna hun an buatsaih bawk a ni.