Serchhip District-a CM Special Package thawh hnihna dawngtute tan infuihtharna neih a ni

Nimin khan Serchhip-ah ‘The Mizoram Bana Kaih (Handholding) Scheme’ hnuaia CM Special Package dawng tura thlanchhuah progress partner mi 30 te tan infuihtharna leh Scheme chungchang inhrilhriatna hun hman niin CM Special Package chu dik leh tangkai taka hmang tura intiamkamna hming ziah tir nghal an ni.
Serchhip DC Pisapui Hall-a ‘The Mizoram Bana Kaih (Handholding) Scheme’ hnuaia CM Special Package dawng tura thlanchhuah progress partner infuihtharna leh scheme chungchang inhrilhriatna hun hi Serchhip Bawrhsap Paul L. Khuma chuan kaihruaiin Progress partner tura thlanchhuah kalkhawmte chu theihtawp chhuah turin a fuih a. Hnathawhna tur hmanrua sawrkarin CM Special Package hmanga a pek chu a hmanna tur dik taka hmang tur leh an chhungkua theuh sum lakluh tihpun chu an ko-ah a tla a ni tih hre turin a chah a. Mizoram Sawrkar hmalakna Bana Kaih chu India sawrkarin Vikshit Bharat a kalpui mek nen a inhne rem hle tih pawh sawiin, Sawrkar Laipuiin kum 2047-ah India ram hi ram changkang (developed country) ah siam a tum a; mimal tin kum khat thawhchhuah (per capita income) chu a tlem berah cheng nuai 15 tal a nih theih nan tan a la dawn tih sawiin, “Chu dinhmun thleng thei tur chuan Bana Kaih Scheme hi a tangkai hle dawn a ni,” a ti bawk.

Serchhip District-a The Mizoram Bana Kaih (Handholding) Scheme hnuaia CM Special Package dawng tura thlanchhuah progress partner mi 30 te hi AH &Vety Department hnuaiah mi 18, Commerce and Industries Department hnuaiah mi 10 leh Horticulture leh Fisheries Department hnuaiah mi pakhat ve ve te an ni a. Heng mite hi dik leh tangkai taka hmang tura intiamkamna hming ziahtir an ni a. September 2025-a bul tan CM Special Package thawhhnihna kal meka progress partner thlanchhuahte hian an hmalakna (project) an zawh hma chu Mizoram Bana Kaih (Handholding) Scheme hnuaia hamthatna dangte an dil thei rih dawn lo a, a Phase zawh hunah erawh an dil leh thei thung anga. Heng progress partner te hian an hmalakna te an tihhlawhtlin theih nan Sawrkar Department-a thawktuten an vil zui dawn bawk a ni.

Nimin-a he hun hman ah hian Serchhip DIPR buatsaih CM Special Package thawh khatna dawngtu, mi hlawhtlingte chanchin (Success Story)  chu tihchhuah niin thlirho a ni a, Serchhip DC Office-a SDC, Dr. C. Vanlalchhanhimi chuan he Scheme nihphung te a sawifiah bakah Progress Partner te tan an duhzawng sawina hun leh zawh duh an neih te zawhfiahna hun buatsaih sak an ni bawk.