Mizo Diaspora Cell in Mizoram State pawn a harsatna tawk mi 30 Mizoram-ah a hruai haw tawh

Chief Minister Office hnuaia din ‘Mizo Diaspora Cell’ chuan din a nih atangin Mizoram pawn a harsatna tawk Mizo mi 30 bawr vel Mizoram a hruai haw an nei tawh a. Mizoram pawn leh India ram pawna zin chhuak leh hnathawkte chu dan zawm tha turin a hriattir nawn leh bawk.

Khawvel ram hrang hranga awm Zofate nena inthlunzawmna tha neih a nih theihna tura sawrkar in June 11, 2024-a Chief Minister Office-a a din, Mizo Diaspora Cell hotute sawi danin, Mizoram pawn leh ram pawn (foreign) a harsatna hrang hrang tawk Mizo 30 bawr vel te chu Mizo Diaspora Cell hmalakna in Mizoram-ah hruai an ni tawh a, ram pawna case neihna langsar zualte chu Dubai, Maldives, Nepal, China, Malaysia-ah te an ni a, mi tam tak chu Passport lem hmanga Myanmar kaltlanga ramdanga dan lova hna thawka kalte an ni. Hemi a nih avang hian Mizo Diaspora Cell chuan Mizoram atanga hnathawk tur emaw, sumdawng turte chuan India dan leh an tlawh tur ram dante tha taka zawm turin a ngen tharleh a ni.

Tunhnaia an thutkhawmna ah Mizo Diaspora Cell chuan, tanpui ngaiten awlsam taka thu an thlenna tur te, an thu thlente rang zawka dawnsawn theihna tur te, Best practices-te leh ram danga thawk turte tih tur/tih loh tur (Do’s and Don’ts) te leh thil tangkai dang in hrilhriatnan Social Media Platforms hman uar an rel a. Mizo Diaspora Hub-ah hmun hrang hranga Mizo Welfare Association an inziaklut mek a, he Hub hi tangkai taka hman a nih zel theihna turin a tam thei ang ber inziaklut turin an ngen a ni.

Chief Minister Lalduhoma chuan June ni 21, 2025 khan Aijal Club-ah Mizoram pawn hmun hrang hranga awm Mizote inthlunzawmna tur Mizo Diaspora Hub chu Mizo Diaspora Cell hnuaiah a lo hawng tawh a. Mizo DiasporaHub hi Mizo Diaspora Cell leh LushAITech tangdunin an siam a ni a, hmun hrang hranga cheng Mizote inthlunkhawmna tur internet portal a ni. Portal hi Playstore leh Appsstore-ah download theih a ni a, mizoram.diasporahub.in atanga luh theih a ni bawk.