Registrar of Cooperative Societies Computerisation hawng

Chief Minister Lalduhoma chuan nimin khan a Pisa-ah ‘Registrar of Cooperative Societies Com-puterization’ chu a hawng.

Hemi puala hun hman ah Chief Minister Lalduhoma chuan mipuite tana sawrkar dawr dan awlsam leh rang an ngaihhlut thu sawiin, “Kum hnih chhung lekin chutiang hmalakna chu kan nei nual tawh a. Hmalakna pawh a awm chho zel a. Digital service lama India rama hmahruaitu nih hi kan duh a ni,” a ti a. “Kan State a zim a, mipui kan tlem a, ziak leh chhiar thiam vekna State kan ni a, sap tawng hria kan tam a, digital service lama a tha ber nih theihna remchang kan nei ah kan ngai a ni. Hma pawh kan la nasa a, kum hnih chhung hian Online Service portal hi 20 aia tam kan siam tawhin a rinawm,” tiin  Cooperation Department Computerization an hawn thar chuan khaw hrang hranga Society-te tan awlsamna tam tak a thlen dawn thu leh a thawktute tan pawh awlsamna a pek dawn thu a sawi a ni.

He hunah hian Cooperation Department Commissioner & Secretary Adit Prakash Rai IAS chuan RCS Computerisation Project hi Mizo-ram-ah March 29, 2025 khan kalpui tan a nih thu leh RCS Office, Aizawl chauh ni lovin District hrang hranga Cooperative Office-te a huam vek thu a sawi a. Cloud Infrastructure atan INEXT Systems Private Ltd, Zarkawt, Aizawl chu thlan an ni a, Software development hi National Informatics Centre Services Incorporated (NICSI) kaltlangin an empanelled firm Velocis Systems Pvt Ltd (CMMI Dev 2.0 Maturity Level 5), Noida, Uttar Pradesh, chuan software hi an siam a ni.

He hna hi Computerization of RCS Offices of States/UTs project hnuaia thawh a ni a, he project-in a tum ber chu Cooperative Society-te tana an hna thawhna kawnga samkhaina (ease of doing business) siamsak leh Cooperative Society ten a hmuna Office dawr kher ngai lova digital-a RCS Office leh District-a Cooperative Office-te nena an indawr tawn theihna tur a ni.