North Vanlaiphai tui lakna hnathawh mek enfiah a ni

North Vanlaiphai khaw mipuite tana Tui lakna tura hnathawh kal mek chu Mizoram State Project Monitoring Team te chuan Zirtawpni khan a hmun ah kalin an enfiah.
North Vanlaiphai khaw mipui tana tui thianghlim in tur lakna tura hnathawh kal lai mek, North Vanlaiphai Water Supply Scheme Rawleihlawn Pumping hi North East Special Infrastructure Development Scheme (NESIDS) sum Rs.1,98,64,491/- hmanga thawh niin October ni 21, 2022 atanga thawh tan a ni a, kum hnih (2) chhunga zawhfel tura ruahman ni mah se tun thleng hian zawhfel ala ni lo a. Mizoram State Project Monitoring Team te hian Feb. 6, 2026 khan a hmunah kala enfiahin MSPMC Vice Chairman Er. Lalthanzuala chuan Pump hmunah Pre-Visit Discussion a neihpui a, Project an endik dan tur leh hna kal mek zawh hun a ni tawh dan te leh harsatna hrang hrang avanga zawh a la nih loh dan a sawi a, an endikna turah khawtlang hruaitu kalkhawmte leh hnathawktu te an duh dan leh thil an kalpui dan dik tak sawi lang turin a ngen a ni.

He Project an endiknaah hian Building hrang hrang hnathawhte, Electric Transform, Pump meterial (khawl hrang hrang) an hman te a dik ngei em tih an enfiah a ni. Khawchhung a Distribution Line te leh Main Reservoir Tanky te chu a hmunah enfiah a ni bawk a. Inspection Team te chuan tun aia nasa leh chak zawk a hna thawk turin Contractor te an ngen a, mipuite mamawhna a sanzia te in hrilhin March, 2026-ah chuan zo ngei tura tan la turin a chah bawk a ni.

North Vanlaiphai tana tui lakna hna hi PHE Serchhip WATSAN Division hnuaia Contractor S.S. Construction, Chaltlang, Aizawl ten thawkin, he pump hi ni khatah darkar 16 pump thei tura beisei a ni a, Cubic Metre 720 (9lakh litrs) pump thei tur a ngaih a ni. Heng hnathawh hrang hrang enfiah a nih hnu hian N.Vanlaiphai Tourist Lodge-ah Exit Meeting neii lehin khawtlang hruaitu mui thahnem takin an telpui bawk a ni.