AMVCA hruaitu ten Chief Minister lawmthu an hrilh

All Mizoram VC Association (AMVCA) hruaitute chuan Zirtawpni khan Chief Minister Lalduhoma chu a Pisa-ah hmuin Village Council ten Fifteen Finance Commission Grand (FFC) tha taka an thawh theih nana chak taka hma a lakpui avangin lawmthu an hrilh a, an mamawh hrang hrangte an thlen nghal bawk.

AMVCA hruaitute chuan VC ten khawtlang hmasawnna hnathawhna tur FFC tha taka an thawh theih nana Chief Minister leh Finance Minister a nihna anga chak taka a bawhzui sak avanga Mizoram VC zawng zawngten khawtlang hmasawnna tur pawisa tam tak an hmuh phah chu lawmawm an tih thu Chief Minister hi an hrilh a, Chief Minister Lalduhoma kaihhruai sawrkar in VC te a ngaisak avanga lawmthu an sawi bakah Chief Minister chuan AMVCA hruaitute hnenah FFC atana theihtawp an chhuah thu leh a hlawhtlin theih nana rim taka thawktu zawng zawngte pawh an fakawm a tih thu a sawi a ni.

AMVCA hruaitute chuan Chief Minister hnenah hian VC lawmman tihsan chungchanga ngenna an lo thlen tawh chungchangte, Aizawl-a Village Council Khualbuk neih chungchangte leh All Mizoram VC Conference neih chungchangte an thlen bawk a ni.

AMVCA hruaitute chuan Zirtawpni vek khan RD&AD Minister Prof. Lalnilawma pawh hmu bawkin Village Council mamawh hrang hrangte a hnenah an thlen bawk a. VC ten khawtlang hmasawnna atana hna an thawhna turah theihtawp a chhuahpui thin avanga lawmthu an hrilh bakah VC te lawmman tihpun a nih theih nana theihtawp a chhuahpui avangin lawmthu an hrilh bawk a. LAD Director thar Dr. Lalngura Tlau pawh hmuin thawhhona tha leh chak zawk an neih zel theih nan duhsakna an hlan bawk a ni.