National Defence College-a Officer ten Serchhip an tlawh

Serchhip District tlawh mektu National Defence College-a Officer rual te chuan nimin khan Serchhip-a sawrkar Department leh tlawmngai pawl aiawhte kawmin Serchhip Mat Phai Zawlpui zau an tlawh nghal bawk.
New Delhi-a National Defence College-a Officer rual 17 te hian niminpiah-a Serchhip District an rawn thlen hnuah nimin khan Serchhip rawn thlengin Serchhip Bawrhsap Pisapui Hall-ah Serchhip District-a Official te leh tlawmngai pawl hruaitute nen an inkawm a, he hun hi Bawrhsap Paul L. Khuma chuan kaihruaiin Serchhip District dinhmun tlangpui te, sawrkar hmalakna te, Tourism lam hawia hmalakna te, Agriculture leh Horticulture kaihhnawih hmalakna te, Rural Development lama hmalakna te, zirna dinhmun te, Police leh dan leh thupek kengkawhtute hmalakna te bakah thil pawimawh dang te a lem nen entira hrilhfiah an ni a. Sawihona hun te, zawhna leh chhan hunte hman nghal a ni bawk.

Bawrhsap Pisa-a hun an hman hnu nimin chawhnu lam khan Serchhip Mat Phai-a Zawlpui Zau-ah National Defence College team te hi hruai an ni a. District Horticulture Officer (DHO) R. Lalrintluanga leh a thawhpuiten kaihruaiin thlai leh chawhmeh thar kawnga Serchhip mipuite leh sawrkar hmalaknate a hmunah an fanpui a ni.

66th National Defence College Course for Understanding India Study Tour (UIST) nei mek Serchhip rawn tlawhtute zingah hian India ram hmun hrang hrang atanga Officer te bakah Germany, Maldivies, Morocco,Russia leh Nepal atanga rawn kal te an tel a, nizan khan Thenzawl ah riak lehin Vawiin hian Aizawl lam panin an chhuak leh dawn a ni.