MPSC in result tihchhuah tawh an siamtha leh dawn

Mizoram Civil Services (Combined Competitive) Examinations-2025 Final Result chu siamthat a ni dawn.

Hemi chungchanga Mizoram Public Service Commission (MPSC) in nimin, Feb. 16, 2026-a an sawi danin Mizoram Public Service Commission chuan Mizoram Civil Services (Combined Competitive) Examinations-2025 Final Result chu February ni 9, 2026 khan Notification No. MCS/1/2025-MPSC(PE) dt.9.2.2026 hmangin a lo tichhuak tawh a. Mizoram Sawrkar-ah recommendation thehluh tum a nih lai mek in hemi kaihhnawihah hian thil thleng thar (development thar) a awm avangin Mizoram Public Service Commission chuan nimin, Feb. 16, 2026 thlengin recommendation a thehlut ta rih lo a ni.

A tira hriat tel loh information thar a awm avangin candidate zinga pakhat chu technical ground-in a tling lo tih hmuhchhuah a nih thu MPSC hotute chuan sawiin, “Mizoram Civil Services (Combined Competitive) Examinations-2025 Final Result, Mizoram Public Service Commission in a tihchhuah tawh chu ennawn a siam that (recast) a lo tul ta a. Result hi ennawn a, siamthatna tihchhuah a nih veleh ni 9.2.2026-a Final Result tarchhuah tawh chu a thiat/sut nghal dawn a ni,” an ti bawk.