Serchhip-ah Kangmei ven Hapta hawnna neih a ni

Tun thla ni 13 thlenga hman tur Kangmei ven kawnga beihpui thlakna Hapta, Fire Prevention Week chu nimin khan Serchhip District-ah a hawnna neih a ni.
Fire Prevention Week hawnna hi Serchhip Bawrhsap Pisapui Hall-ah neih niin khuallian nia he hun hmanpuitu Bawrhsap, Paul L. Khuma chuan mei chu a awmna tura a awm a, a hmanna tura hman a nih chuan a thain a tangkai em em a; amaherawh chu, a kan lohna hmun tura mei a kan chuan engmah thliar lovin a hmaa awm a tichimit thin a. Chuvangin, mei laka kan fimkhur a, kangmei a chhuah lohna tura inzirtir a pawimawh em em a ni, a ti a. Kangmei ven kawnga hmalakna chu sawrkar official te ta bik ni lovin kan zavaia mawhphurhna a ni tih hriain thawhhopuiah Serchhip District mipuite a sawm nghal bawk a ni.

Kangmei Ven kawnga beihpui thlakna Hapta hawnna hi District Honorary Wildlife Warden C. Lalhminghlua chuan kaihruaiin Thenzawl DFO leh District Fire Prevention Committee-a Member Secretary Dr. R. Lalnungrenga chuan mei kawng sial pawimawhzia a sawi a. Mizote chu Lo vat-a hal leh thin kan nih avangin ram a kan lohna turin mei kawng zau taka sial chu kan tih ngei ngei tur a nih thu a sawi a. Ramngaw leh ramkang chungchanga Mizoram leh Serchhip District dinhmun tlangpuite leh kumina Fire Prevention Week a hmalak dan tur Committee in a ruahman te pawh a tarlang nghal bawk a ni.

Fire Prevention Week 2026 hi Mizoram pumah February 9 atanga February 13 chhung hman tur niin thupui atan ‘Nungchate chenna leh tui thianghlim min petu ramngaw, kangmei lakah venghim rawh’ tih hman a ni a. Nimin-a he hun hmanna a tel te hian Serchhip District Joint VC Chairman B. Vanlalsawma kaihhruaina hnuaiah Fire Prevention Week pualin kan ram duat taka enkawl leh venghim tur te, midangte zirtir chhawng zel turte in thutiam an la a, sawrkar mui pawimawh leh khawtlang hruaitute an tel a ni.