‘Masihi Sangati Serchhip Pastor Bial’ thar hawn a ni
Nikum December thlaa Mizoram Synod Inkhawmpui chuan ‘Masihi Sangati Serchhip Pastor Bial’ thar hawn hi remti in nimin khan Serchhip Kawnpui Kohhran Biak In-ah Bial thar hawnna Inkhawm hi neih a ni a, Mizoram Synod hnuaia Masihi Sangati Kendra Director Rev. R. Lalrin-sanga chuan Inkhawm kaihruaiin Bial thar hawnna a nei nghal a, he hunah hian Chhimchhak Area-a Secretary Upa Deependra Chhetry chuan Bial thar hawn chungchang hi sawiin, Vice Chairman Upa PZ. Dingluaia chuan tawngtaina hun a hmang a ni.
Nimin vek chawhnu Inkhawm ah ‘Masihi Sangati Serchhip Pastor Bial’ enkawltu tur, Pastor C. Lalruatkima dahngheh Inkhawm chu Serchhip Kawnpui Kohhran Biak In-ah hian neih nghal a ni a, Chhimchhak Area-a Secretary Upa Deependra Chhetry chuan Pastor thar chanchin sawiin, Masihi Sangati Kendra Director Rev. R. Lalrinsanga chuan Pastor thar hi a dahnghet bawk a ni.
Mizoram Synod hnuaia Masihi Sangati Kendra hnuaiah hian Pastor Bial 10 awm thinin tunah hian Pastor Bial 11 a awm dawn ta a, Bial thar hawn a nih hma hian ‘Aizawl South Pastor Bial’ huamchhungah Serchhip pawh hi awmin Aizawl Mission Veng atangin rawn enkawl a ni thin a. Tuna Serchhip Bial hawn thar a nih takah chuan he Bial hian Presbyterian Kohhran-a Pastor Bial 22 zet a huam dawn a, hmar lamah Tlungvel Bial chin huamin chhim lamah Bungtlang Bial chin a huam dawn a, Khawchhak lamah Cherhlun Bial thleng huamin khawthlang lamah Thenzawl-a Pastor Bial te a huam dawn bawk a. Presbytery pali (4) te huamin Masihi Sangati Fellowship 7 a awm a, Member 200 vel an awm a ni.
Masihi Sangati Aizawl South Bial-ah hian Pastor Bial 14 ala awm dawn a, Fellowship 27 awmin Member 250 vel an la awm a ni.
Comments
Post a Comment
I ngaihdan i sawi hian mipui ngaihdan i tarlang a ni!