‘I LOVE SERCHHIP’ tichhetu nia hriat te man an ni tawh
Serchhip Beautification Project hnuaia Serchhip khawpui cheina atana Bukpui leh Chhiah-tlang inkar-a ‘I LOVE SERCHHIP’ tih dah thar hi dah a nih hnu reilote ah hawrawp pahnih ‘S’ leh ‘E’ te chu tihchhiat niin a tichhetute zawnchhuah an nih theihna tur hian Serchhip District Bawrh-sap Pisa chuan Serchhip Police Station-ah FIR thehlutin December 1, 2025 khan thubuai ziahluh nghal a ni a. Serchhip Police te chuan ngawrh taka an chhui zui hnuah a tichhetu nia hriat mi pahnih te chu an man a, heng mite hian Police te hnenah an tihchhiat a nih thu hi sawiin, Serchhip District Jail-ah dahluh an ni.
He thil tichhetu nia hriat leh man te hi Serchhip Field Veng leh Serchhip Hmar Veng lam mi nia hriat an ni a, he thubuai chhuitu Ser-chhip Police te chuan heng mite hian an insualna lamah an tichhia nia an sawi thu LENKAWL an hrilh a, hemi chungchang ah hian Chargesheet an la peihfel loh avangin an hming puanzar ala rem loh thu an sawi bawk a ni.
Serchhip Bawrhsap Paul L. Khuma chuan ‘I LOVE SERCHHIP’ tihchhiat chungchang ah pawikhawihtu nia hriat te rang taka an man avangin Serchhip Police te chungah lawmthu a sawi a. Serchhip Beautification Project hnuaia hmalakna peng hrang hrang bakah sawrkarin mipui tana ruhrel a din te reng reng chu mipui ta a nih anga neitu thinlung nen enkawl turin District mipuite a chah a. Vantlang hmun pawimawhte tihhmelhem leh tihchhiat chu danin a khap thu sawiin, phalna la hmasa lova mimal leh pawlho in lo tihdanglam pawh dan bawhchhiatna a nih thu mipuite a hriattir nawn leh a. Hetiang thil a thlen tawh lohna tur leh vantlang thil tihchhiat avanga hrem ngai an awm tawh loh nan thawhhopuiah mi tinte a sawm a ni.
Comments
Post a Comment
I ngaihdan i sawi hian mipui ngaihdan i tarlang a ni!