ZPM kaihhruai sawrkar in hna an thawk tha niin sawi

Tawi Bialtu MLA leh Minister Prof. Lalni-lawma chuan ZPM Party kaihhruai Mizoram sawrkar, kum 2 pawh la tling lo chuan hna a thawk nasa in a thawk tha hle niin a sawi.

Seling a YMA Hall kalkawng leh Thingsul Tlangnuam-a Futsal ground hawnna bakah Futsal Tournament kickoff-na nimin-a a hmanpuina ah Minister Prof. Lalnilawma chuan Mizoram a sawrkar kal tawh te chu an sawrkar hun chhung rei ang a an hnathawh en in ZPM Party kaihhruai Mizoram sawrkar, kum 2 pawh la tling lo chuan hna a thawk nasa in a thawk tha hle tih a sawi a, “Pu Lalduhoma kaih-hruaina hnuaiah Minister leh Sawrkar hnathawk te’n mipui tan theihtawp an chhuah a, duhthusam in thil kal duak duak thei lo mah se hmasawnna hnathawh hrim hrim hi a tha thawkhat a, a bikin thingtlang lama kan kuthnathawk te’n rate hre sa a Sawhthing an ching thei ringawt pawh hi hmasawnna nasa tak a ni,” a ti. Thalai te ruihhlo lakah an fihlim theih nan sawrkar in nasa taka hna a thawh thu pawh Minister chuan sawiin, thalai te chu ruihhlo laka an fihlim theih nan an hunawl te hmang tha tura chahin, Kohhran leh khawtlang activities-ah in hmang tam turin a fuih bawk.

Seling YMA Hall kawng hi Rural Development & Administration Department kaltlanga MGNREGA hmang a thawh a ni a. Thingsul Tlang-nuam Futsal Ground hi MLA Fund, MGNREGA leh 15th Finance Commission atanga sum hmuh te hmanga siam niin, Futsal Ground-ah hian Sports & Youth Services Department kaltlangin Phul-lem (Artificial Turf) phah a ni bawk.