LADC-ah Vote thlak a ni

Lai Autonomous District Council (LADC) Inthlanpui vawi 12-na neih tur atan nimin khan tluang taka Vote thlak a ni a, tun thla ni 9 khian Vote tla te hi chhiar tur a ni ang.

LADC Inthlanna hi MDC Bial 25-ah neih a ni a, nimin zing dar 7:00 atang khan mipui ten Vote thlakin nimin tlai dar 4:00 thleng khan Vote nei 56,873 zingah Voters 45,617 ten Vote an thlak a, Vote za zela 80.21 a tla a ni. Nimin-a Vote thlak ni-ah hian khawi tang mahin thil duhawm lo a thlen hriat a ni lo a, Vote thlak hi zawhfel a nih veleh Vote thlakna khawl te chu Lawngtlai panpui nghal an ni a, tun thla ni 9 zing dar 8:00 atangin Govt. Lawngtlai College-ah Vote tla te hi chhiar a ni ang.

Tun tuma Inthlanna ah hian 5/2 Lungtian-II Polling Station-a 1st Polling Officer hna thawk tur, Israel Malsawmdawngliana (Lawngtlai Council Veng) chu nimin zing khan a thawhpui ten kaitho zo lovin a boral a, nimin vek khan vuiliam nghal a ni.