Inrinni zing-ah Bazar-a Vawksa zuar an awm lo

Inrinni khan Serchhip Bazar-ah Vawksa zuar an awm mumal lo a, hei hi Sa rate bithliah thar vang nia hriat a ni.
    Tarlan tawh angin Zirtawpni kalta a Serchhip Bawrhsap kaihhruai District Level Committee (DLC) on Fixation of Price of Meat, Vegetables and Fruits thukhawm chuan thilman sang zel ngaihtuahin vawksa man chu kumin December ni 13 ttangin Serchhip khawpui (Town) chhungah kg-ah Rs. 450 ni tawh se tiin an rel a. Hemi hmalam hian mi thenkhat chuan Vawksa man hi an lo tisang tawh a, sawrkar thuneitu ten ‘Mimal emaw, pawlho in emaw sa leh thlai man (rate) an duhzat bithliah hi The Mizoram Market (Regulation and Facilitation) Act, 2022 bawhchhiatna a nih avangin hrem theih an ni’ tih an puanzar tak avang hian Serchhip Bazar-a Sa zawrhna hmunah hian Vawksa zuar hi an awm lo niin a lang a ni. Hetihlai hian Serchhip khawpui chhung Veng thenkhat ah chuan Vawk talh leh a sa zuar hi an awm tho niin a lang a, heng Vawksa zuartute hian kg. khat Rs. 450/- in an hralh niin thudawnna chuan a sawi bawk.