Infiammi mi 265 te Sports Incentive Cash Award hlan

Mizoram-a infiammi 265 te hnenah nimin khan Mizoram Incentive Cash Award 2025 chu semchhuah niin a vaiin Rs. 94,19,925/- semral a ni.

Sports Incentive Cash Award 2025 semna hun hi Woodland Hills, (Rooftop), Aizawl-ah neih niin he hun hmanpuitu Sports Minister Lal-nghinglova Hmar chuan cheng nuai 94.19 zet infiammite tana semchhuah chu lawmawm a tih thu leh infiammi hlawhtlingte a lawmpui thu a sawi a. “Sports-a Mizoram dinhmun dik tak puanzar ka duh a, kan thawm a nat ang hu leh Sports kan tuipui ang hu erawh chuan kan dinhmun a hniam. Tuna kan kal dan ngaia kan kal reng chuan hma kan sawn thei dawn lo tih a lang reng a. National Games-a Mizoram dinhmun kan thlir chuan kan ropui lo hle a, 28-na kan ni pha tawk a, India-ah a hniam pawl kan ni. Chuvangin kalphung kan thlak a ngai a, hmasawn turin a bulthut atanga kan tan leh a ngai dawn a ni,” tiin kan mamawh ber chu Medal dawngtu tur infiammi promote a nih thu a sawi a, “Sports-ah hian Tribal quota a awm ve lova, chuvangin tih tak takna nen keini aia thleng sang zawk tawhte hneh leh khum thei tura kan inbuatsaih a ngai a ni,” a ti bawk.

Tun tumah hian infiammi 265 te hnenah Mizoram Incentive Cash Award hi semchhuah niin dawng kawp thei an awm avangin mimal-a dawng zat chu mipa 150 leh hmeichhia 68, an vaiin mi 218 an ni a, Sports Discipline hrang hrang 15 atangin infiammi ten Incentive Cash Award hi dawngin Football atangin dawng an tam ber a, mi 37 ten dawngin Arm Wrestling atangin mi 36 in an dawn bakah Muaythai atangin mi 32 ten dawngin dawng tam zual an ni a. Tun tumah hian Rs. 94,19,925/- semchhuah niin kum 2026-ah chuan Incentive Cash Award Scheme thar (2025) hman a ni tawh dawn a ni.