Dan lova Fertilizer (leitha) thawnchhuah thin titawp turin nasa takin hmalak mek a ni tih sawi

Agriculture & Farmers' Welfare Department changtu Minister PC.Vanlalruata chuan ramdang-a dan lova Fertilizer (leitha) thawnchhuah thin titawp turin nasa takin hmalak mek a nih thu a sawi.

Inrinni khan Rangvamual-a CH. Saprawnga Truck Terminal atangin Agriculture Minister hian loneitute hman tur lei tihthatna (fertilizer) phurtu lirthei chu vailiamin India ram hi khawvela mihring tamna ber a nih angin, Buh leh bal kan mamawh pawh a sang em em tih a sawi a. Thlai chinna leilung a dak tawh em avangin Buh leh bal thar chu kumtin a tlakhniam zel thu sawiin, “Loneituten thlai tam zawk an thar theih nan lei tihthatna (fertilizer) hman a ngai a, amaherawh chu fertilizer hi thil man to tak, farmer-ten an lei phak loh a ni a. Loneituten fertilizer tlawm taka an lei theih nan India sawrkar laipui chuan kum 1957 khan ruahmanna thar siamin, Fertlizer siamtu company-te hnenah a siam man hi India sawrkar laipui chuan 90% dawn a pek sak,” a ti a. Sawrkar laipui thuchhuah zawmin Mizoram chuan Agriculture Department kaltlangin kan thlai chinna ram zau zawng mil leh thlaichinna leilunga thlai chaw awm zat (Soil Fertility) milin sawrkar laipui-ah report a pek thin thu leh chutiang chuan kumtin sawrkar laipui atangin Mizoram chanvo fertilizer loneituten tlawm taka an lei theih tur a dawn thin thu a sawi a ni.

Agriculture Minister chuan Mizoram quota fertilizer chu a chanvo neitu loneituten MRP ang ngeia an lei theih nan leh hnianghnar taka an hmuh theih nan sawrkar chuan theihtawp chhuahin, ramdanga Dan lova fertilizer thawnchhuah thin titawp tur hian nasa takin hma a lak mek thu a sawi a. District hrang hranga Fertilizer Inspector, Police leh Magistrate-te nen tangkawpin heng dan lova leitha thawnchhuak thinte uluk taka vil reng an nih thu a sawi a. Kumin 2025 chhung hian leitha dan lova sumdawnna atana hman tur Urea bag 5424 leh DAP bag 300 zet man a nih tawh thu a sawi bawk.

Loneituten man man, hnianghnar leh an mamawh huna fertilizer an hmuh ngei theihna turin Mizoram-a Fertilizer dealer pakhat, MAHFED Ltd. kaltlangin Minister hian Urea bag 11200, TSP bag 1800 leh MOP bag 1000 te chu a vailiam a. Heng MAHFED Ltd. hnuaia fertilizer zawrhchhuah turte hi a mamawh tak tak ten an lei theihna turin uluk taka vil zui reng a ni dawn a. Fertilizer hi sawrkar ruahmanna angin MAHFED Ltd. kaltlang chauha lei theih tur a ni a, hriatchian duh nei tan MAHFED Office-ah zawhchian theih a ni bawk.

Inrinni-a heng leitha vailiamna hunah hian Co-Operative Society -a Registrar John LT. Sanga leh Deputy Director (Fertilizer) H. Lalbiakkima te an tel bawk a ni.