Tual-Ui mankhawm enkawl dan tur sawiho

Supreme Court-in tunhnaia Tual-Ui (Straydogs) chungchanga thu a chhuah bawhzuidan tur chu nimin khan Chief Secretary Khilli Ram Meena hovin a kaihhnawih Department hrang hrang hotu ten an sawiho. Supreme Court of India chuan kumin August ni 22 khan Tual-Ui chungchanga thuchhuah hmasa a neih chu siamremin, Tual-Ui mankhawmte enkawl zui dan tur chungchangah thupek thar a chhuah leh a, hemi chungchang sawihona nimin-a neih ah hian UD&PA, Health and Family Welfare leh AH&Vety Department hotute bakah, IPR,P&S Department, Transport Department, Sports&Youths Services Department-te, Aizawl DC leh Lunglei DC bakah Sawrkar hotu pawimawh dangte an tel a. Department hrang hrang hotute thukhawm hian he thupek thar mila Mizoram  sawrkar hmalak dan turte uluk takin an rel a. UD&PA Secretary Lalmalsawma Pachuau chuan Supreme Court thupek leh a bawhzuina atana ruahmanna awmte hi a sawifiah a ni.