World Diabetes Day hman a ni

Nimin November 14, 2025 khan ‘World Diabetes Day 2025’ pualin Aizawl Armed Veng-a 1st Batallion MAP Recreation Hall-ah hun hman niin 1st Batallion MAP te hriselna endik nghal a ni.

1st Batallion MAP-a Dy. Commandant Saidingliana Sailo kaihhruai he hunah hian NHM-a State Nodal Officer Dr. Lalawmpuia Chhangte (Diabetologist) chuan kumin World Diabetes Day thupui ‘Diabetes and the work place’ tih thupui hmanga thu sawiin, Diabetes natna a sawifiah bakah a enkawl dan leh inven dan tur te a sawi a, 1st Batallion MAP staff zawng zawng te chu ram, khawtlang leh mipuite venghimtu an nih avanga an hrisel that a pawimawh thu leh an hriselna ngaipawimawh turin an chah a ni.

Hei bakah hian World Diabetes Day chu November ni 14-ah khawvel pum huapa hman thin a nih thu sawiin, Mizoram-ah pawh National Health Mission (NHM) hnuaia National Programme for Prevention and Control of Non-Communicable Diseases (NP-NCD) hmalaknain he ni hi kawng hrang hrangin hman a lo nih tawh thin thu a sawi a. Mizoram mipuite hriselna tha zawk an nei zel theihnan National Health Mission, Health & Family Welfare Dept. in theihtawp chhuaha hma a lak zel thu a sawi bawk.

He hunah hian Ministry of Health and Family Welfare, Govt. of India atanga lehkha lo kal bawhzuiin November ni 7-a ‘National Cancer Awareness Day’ pualin Cancer natna chung-chang leh a inven dan tur chu NP-NCD a State Programme Coordinator Dr. Martin Chawngsailova chuan a sawi bawk a ni.

National Health Mission, Health & Family Welfare Dept. hnuaia National Programme for Prevention and Control of Non-Communicable Diseases (NP-NCD) hmalakna a he hun hman ah hian 1st Batallion MAP thawktute chu an BP, Blood Sugar leh Body Mass Index (BMI) te a thlawna enfiah sak an ni.