Janjatiya Gaurav Varsh 2025 lawmna hun hmang

India ramin zalenna a hmuh theih nana Tribal hruaitu thawh hlawk tak, Bhagwan Birsa Munda pianchamphaphak vawi 150-na pualin nimin khan Raj Bhavan Circular Lawn-ah 'Janjatiya Gaurav Varsh -Tribal Pride Day' lawmna neih a ni.

Planning & Programme Implementation Department buatsaiha he hun hman hi Larsap General (Dr) Vijay Kumar Singh chuan khuallian nia hmanpuiin India Tribal-te tana hun pawimawh tak 'Janjatiya Gaurav Varsh' puala Mizoram mipuite chibai bukin, hei hian India rama Tribal-te chawimawiin, an hlawh-tlinna, kalphung inhlanchhawn zelna leh hmasawnna te a chawilar a ni, a ti a. India rama chengte chu Tribal kaihhnawih nei vek kan nih thu leh a thenin Tribal hnam ziarang leh nunphung an kalsan tawh laiin a thenin an la chhawmnung zel a, Mizote hi a la kalpui zelte zinga mi a ni, a ti a. Tribal hnam te chu an chhehvela thil awmte nena lungrual taka chengho thiam, nakin zel thlenga khawsakna tlak ram a awm theih nana pawimawh tak an nih thu sawiin, Tribal-te hnam ziarang leh nunphung hausa tak hunhalha chawilar a nih theih nan Prime Minister-in theihtawp chhuaha hma a lak thu a sawi bawk.

Tribal hnam zinga Bbritish awpbehna ata zalên tura beitu mihuaisente chawimawina hunah hian British awpbehna ata zalênna hmu tura dodalna, 'Ulgulan Movement' kalpuitu, India ram puma Tribal hruaitu hriat hlawh tak Birsa Munda, Jharkhand bakah Mizo zinga British rorelna dodaltu - Nikuala, Lianphunga leh Khuangchera te ram tana an inhlanna hriatreng nan Larsap leh official sawm bikte'n an thlalak bulah pangpar an dah a. Janjatiya Gaurav Varsh awmzia leh lawm a nih dante sawifiah a nih bakah Mizo Cultural Organisation (MCO) te'n Mizo hnam lam mawi tak takte entirin Tribal hnam ziarang leh nunphungte an tarlang a ni.