Serchhip Footballer pathum te khelhna Chanmari FC an Champion ta

Zonuna Kawlni /

Mizoram-a Football League sang ber, Mizoram Premier League (MPL) Season 12-na chu khelh zawh niin Chanmari FC chuan Aizawl FC hnehin a vawi thumna atan MPL Champion an ni ta a ni.

Mizoram Premier League (MPL) Season 12-na hi Inrinni zan khan Mualpui-a Rajiv Gandhi Stadium-ah Final khelh a ni a, Mizoram atanga I-League khel tur Team pahnih, Aizawl FC leh Chanmari FC ten Final hi khelin Chanmari FC hian si khat faiin hnehna an chang a, a vawi thumna atan MPL Champion an ni thei ta a ni.


MPL Final-a inhmachhawn Team pahnih te hi tun Season-a Team tha ber pawl-a chhal ngam ve ve an ni a, Aizawl FC hi tun Season MPL League Winner niin League Round-a match 14 an khelh ah vawi 12 hnehna an chang a, vawi 2 an khingpui an inhnehtawkpui a, tlawm nei miah lovin point 38 lai hlawhchhuakin MPL record thar an siam a. Chanmari FC hian match 14-ah tum 9 hnehna changin tum hnih an tlawm a, tum thum erawh an khingpuite nen inhnehtawkin point 30 an hmu a, League Table chung pahnih chu Final-a inhmachhawn te hian an luah a, Semi Final-ah pawh an khingpui te hneh ve ve in Final-ah an inhmachhawn leh ta a ni.

Heng Team pahnih te hi League Round-ah vawi hnih inhmachhawnin an inhmachhawn hmasak zawkah Aizawl FC hian 3-1 in hnehna an chang a, an inhmachhawn hnuhnung zawkah goal inpe lova inhnehtawkin Final-ah erawh Chanmari FC hian si khat faiin hnehna an chang a ni. Final inkhel ah hian Aizawl FC hian ball chang tam zawk mah se Chanmari FC lamin counter attack hmangin an nawr ve reng a, darkar chanve an khelh tlin hma hlekin Chanmari FC hian penalty an hlawhchhuak a, hei hi minute 24-na ah Christopher Kamei chuan goal-ah chantirin hei bak hi hun tawp thlengin goal dang a lut lo a, Chanmari FC hian si khat faiin hnehna an chang ta a ni.

Chanmari FC enkawltu Rochhingpuia hian tun Season-ah hlawh-tlinna nasa tak a chanpui a, I-Day Football-a an Champion bakah I-League khel tura tlingin MPL-ah a Champion pui leh bawk a ni.

MPL Season 12-na a Final-a inhmachhawn Team-ah hian Ser-chhip District player mi 7 lai an tel a, Champion ta Chanmari FC-ah hian Johny Lalremruata (Vengchung), Lalruatsanga (Chhim Veng) leh KC. Malsawmsanga (IOC Veng) te an khel a, Aizawl FC lamah Eric Remruatpuia (Field Veng), K. Lalhriatzuala (Khawlailung), Zomuansanga (Khawbel) leh Vincent Lalduhawma (Baktawng) te telin Zomuansanga hian Best Forward leh Top Scorer chawimawina a dawng nghe nghe a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Kawng siam dawn hnai

Zonuna Kawlni /
Image
National Highway-02 siam a nih hnuah he kawngpui in Serchhip Town chhunga a paltlang tawh loh, Chhiahtlang leh Serchhip khawpui chhung kawngpui siamthat hna chu PWD Serchhip Division ten an thawk dawn hnai nia thudawn niin hemi atan hian sum pawh ruahman a ni tawh nia thudawn a ni a. Tun tumah hian khawpui chhung paltlangtu Kikawn leh Sailiamkawn inkar chu Bituminous concrete a siam tum niin kawng siam hi zawhfel a nih hnuah chuan thla ruk (6) chhung Road cutting phalna pekchhuah a ni dawn lo a ni. Tun tuma kawng siam hna thawh turah hian New Serchhip North VC huamchhunga kawng kual nasa lutuk chu paih turin ruahmanna siam a ni bawk nia thudawn a ni.
Kimchang zawkin »

SEDBA hruaitu an thlang

Zonuna Kawlni /
Image
Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.
Kimchang zawkin »

DIET Serchhip ten an titha

Zonuna Kawlni /
Image
Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.
Kimchang zawkin »