ASF hri leng in ziaawm lam a pan chho; Kumin ah ASF vangin Vawk 9622 a thi tawh
AH & Vety Department chhinchhiahna atanga a lan danin kumin October thla tawp thleng khan Mizoram-a District 11 zinga District 8-ah ASF hri leng hi hmuh a ni a, District 8-a khaw 169-ah chhungkaw 3287 ten Vawk hri leng avang hian harsatna an tawk a ni. District mal-ah Siaha chu Vawk hri leng tuar nasa ber niin khaw 42-a chhungkaw 1357 ten ASF hri avang hian harsatna an tawk a, Vawk thi 3545 awmin Vawk 940 suat a ni bawk a, Lawngtlai District-a khaw 18-a chhungkaw 381 te pawhin harsatna tawkin an District-ah hian ASF vanga Vawk thi 1771 leh Vawk suat 394 a awm bawk a, Khawzawl District-a khaw 16-a chhungkaw 585 te Vawk 1603 thiin Vawk 188 suat a ni bawk. Lunglei District-ah ASF vanga Vawk suat tam berin 1619 suat a ni a, heng bakah hian Aizawl, Mamit, Champhai leh Hnahthial District ten ASF vang hian harsatna an tawk a, Serchhip bakah Kolasib leh Saitual District-ah te ASF avanga Vawk thi leh suat chhinchhiah a awm lo thung a ni.
ASF leng hi October 18, 2025 atang khan a ziaawm chho tan nia hriat ni mah se, kar kalta Thawhtanni kalta khan Ainawn Veng-ah Vawk pathum an thi leh a, hei bak hi chu tunhnaiah ASF vanga vawk thi leh suat an awm lo a ni.
AH & Vety department-a ran natna lam buaipuitute chuan, “Kumtin June, July leh August thla vel hi ASF hluar zual hun a niin hei hi natna kalphung ve hrim hrim a ni a. A tlangpuiin Thlasik-ah hi chuan a ziaawm ve deuh thin a, hri kai leh thi an awm pawhin tlemte chauh an ni tlangpui thin a ni,” an ti a. ASF vanga Vawk suatte compensation (zangnadawmna) chu pek tum a ni tih sawiin, “Vawk thi hrim hrim hnenah chuan zangnadawmna hi pek a ni dawn lo a, hri vei nia rinhlelh vanga Vawk suat tuartute hnenah chauh pek a ni dawn a. Zangnadawmna hi Vawk len dan a zirin an dawn/pek zat tur pawh a inang dawn lo a, Vawk rih dan azirin a rate pawh a hrang dawn a ni,” an ti a. Zangnadawmna hi kum thar January velah sawrkar laipuiah dil an tum tih an sawi.
Nikum lamah khan ASF vanga Vawk thi chu Disaster-ah puan a ni a, kumin ah erawh a ziawm deuh avangin State Disaster-ah puan a ni lo a, hei vang hian zangnadawmna hi pek an ni dawn lo a. ASF vaccine hi Vietnam ah chuan a awm tawh nia thudawn a ni.
Department-a thawktute chuan Vawk natna chi khat, PRRS (Porcine Reproductive and Respiratory Syndrome) chu a vâng tawh hle niin an sawi thung a. Bawng/Lawi/Sial natna FMD (Foot-and-Mouth Disease) pawh kum 2023-a Kolasib District-a hmuh a nih bak chu hmuh nawn a la ni lo tih an sawi a. FMD vaccine hi kum khatah vawi hnih an pek thin vangin hri kai hi an awm lo nia an hriat thu an sawi bawk.
Comments
Post a Comment
I ngaihdan i sawi hian mipui ngaihdan i tarlang a ni!