Rawthing tam tuar nasa zel
Agriculture & Farmers' Welfare Department hotute sawi danin Rawthing tam avanga tuartu chhungkaw 5,622 te hi District 11-a khaw 170 aia tlem lova chengte an ni a. Sazu puangin thlawhhma a tihchhiat zau zawng hi tunah hian lakkhawm mek a ni a, November ni 10-ah chuan Mizoram puma Buh leh thlai a tihchhiat zat,chiang leh felfai zawka puan theih an inbeisei thu an sawi a ni. Thingtam Sazu puangin thlawhhma a tihchhiat hi nasa takin a pung chho a. September thla tawpah Lunglei District ringawtah loneitu chhungkua 121 thlawhhma a tihchiat laiin tunhnaiah chuan chhungkaw 719 thlawh-hma an seh tawh a ,Lunglei District bikah hian a tira khaw 11 chauhin an tawrh laiin tunah chuan khaw 19-in nasa takin an buaipui tawh a, kuthna-thawktute thlawhhma a tihchhiat phei chu an pung nasa hle a, a huhova Tur hmanga Sazu hrai pawh an bei nasa hle a ni.
Serchhip District-ah pawh Chawm, Chamdur, Thliarpui, Lumtui, Tuichar, Zuangleng, Zehtet, Thuhruk, Lungbu, Luitedam, Tuisen leh Lathei Zau-a thlawhhma-ah te Serchhip Joint VC leh Agriculture Department hnathawkte'n a huho a Sazu hrai runpui chu tunhnai ah khan neih a lo ni tawh a ni.
Agriculture & Farmers' Welfare Department chuan Sazu Tur tam tham tak an sem tawh niin an sawi a. Rawthing tam avanga kuthnathawktute tawrhna leh hloh hi State Specific Disaster a puang turin Disaster Management & Rehabilitation-ah ngen mek a. He lama thuneitu sang ber State Disaster Management Authority (SDMA) chu an Chairman, Chief Minister hova thukhawm thuai tura an beisei thu dawn a ni a. Rawthing tamin a hrin Sazu puang avanga an buh leh bal leh thlai tam tak chantute hi zangna-dawmna pek theih a beiseiawm Department hotute chuan an sawi a ni.
Comments
Post a Comment
I ngaihdan i sawi hian mipui ngaihdan i tarlang a ni!