Police chawimawi dawn

Sawrkar laipui-a Ministry of Home Affairs chuan tunhnai khan India rama Police chawimawina sang ‘Kendriya Grihmantri Dakshata Padak’ dawng tur list a tichhuak a, an zingah hian Sub Inspector Samuel Lalramenkima, Kanhmun Police Station-a OC thin, tuna Marpara PS OC ni mek chu a tel.

SI Samuel Lalramenkima hian kumin February ni 13-a Bungthuam khaw mi Lalfakmawia (59) thihna chungchanga mawhphurtu mi pariat te a man avangin chawimawina hi a dawng dawn a. Lalfakmawia hi kumin February ni 13 khan Bungthuam leh Luimawi inkar luiah thiin hmuh a ni a, Kekawrte leh T-Shirt chauh hain, a nghawng ah gamchha a insuih bakah a lu-ah tuboh hmanga chhutna hmun ngaah a awm bawk a. Kanhmun Police Station-ah thubuai ziahluh niin he tual-thihnaa inhnamhnawih a nupui Sondorung Reang leh a thurualpui Mizo pakhat bakah Bru parukte chu an man vek a ni.

Chief Minister Lalduhoma chuan SI Samuel Lalramenkima hi a lawmpui thu Social Media kaltlanga tarlangin, “India ram Police chawi-mawina sang 'Kendriya Grihmantri Dakshata Padak' dawng tura thlan a ni hi ka lawmpui a, ka chhuangin, a phu ka ti hle mai,” tiin a kal zelna turah duhsakna a hlan nghal bawk a ni.