MIAS kal dan tur sawiho

Mizoram Institute of Advanced Studies Governing Body chu nimin khan an Chairman leh Chief Minister Lalduhoma hovin CM Conference Hall-ah an thukhawm a, he hunah hian an kal zel dan tur sawiho a ni. Mizoram Institute of Advanced Studies hi kum 2011-a Mizoram sawrkarin a din niin Autonomous Research Institute, zirbingna chi hrang hrang kalpuina hmun tura duan, Central Fund ringa enkawl tur leh Ministry of Human Resource Development hnuaia Regional Institute ni thei tura ruahman a ni a. Planning & Programme Implementation Department chu Nodal Department an ni bawk. Tunah hian Mizoram sawrkar chuan MIAS hi nung zawka kaltir a tum mek a, an Office turin MINECO ah Room pek an ni a. An hmalak zel dan tur zirchiangtu tur Sub-Committee chu anmahni chhungah an din a, sum leh pai dap dan tur pawh an sawiho bawk a ni.