Lirthei chesual ah boral

Nimin khan Serchhip leh Keitum inkar Ralkiauva Kham an tih thin ah lirthei pakhat chesualin Motor a chuang Lalnghaktluanga (24) s/o PC. Lalrinchhana, Keitum Field Veng chu a hmunah a boral.

Thudawn danin he Motor (Mahindra Bolero Neo) hi Laltlanfela, Keitum khua ami ta niin Airtel Company ten an hman a ni a, nimin zing dar 9:30 vel khan Serchhip-a Airtel-a thawk te hruai turin Keitum atangin a chhuak a, a thlen tak mai loh avang leh Phone hmanga biak an tum pawha a chhan theih tak loh avangin mi tlawmngai ten an zawng a, nimin chawhma dar 11:00 vel khan Keitum atanga Serchhip lam KM 5 vela hla, Ralkiauva Kham an tih mai thin ah a lirthei chesual hi hmuh a ni a, a Motor bulah hian amah pawh lo awmin a lo boral tawh a ni.

He lirthei-ah hian a khalhtu Lalnghaktluanga chauh hi a chuan avangin a chetsual chhan hi hriat theih a ni lo a, Motor hi a lum thuiin meter 400 chuang zet a lum nia ngaih a ni a, Serchhip atangin Police te pawh kal nghalin tih tur tul ang ang tih nghal a ni a, a ruang hi nizan khan lumen niin Vawiin hian Postmortem a nih hnuah vuiliam tur a ni ang.