Larsap in zin turte a thlah

Mizoram Larsap General (Dr) Vijay Kumar Singh chuan India ram hnam ziarang leh nunphung danglam nasa em em chu kan chakna leh inpumkhatna atana pawimawh tak a nih thu a sawi.

Hnam inpumkhatna leh inunauna chawilar nana Assam Rifles buatsaih 'National Integration Tour-2025' a kal tur Lunglei, Siaha leh Lawngtlai District atanga thlanchhuah Zirlai 20 leh Zirtirtu 2 bakah anmahni hruaitu Assam Rifles Official-te thlahna hun nimin-a Raj Bhavan Circular Lawn-a buatsaih ah Larsap chuan National Integration Tour-a kal turte a lawmpui thu sawiin, Tour kaltlanga thil zir turte chuan zirna mai bakah an thanlen zelna kawngah hriatna leh thiamna pein a pui dawn tih a sawi a. Sairang Railway Station atanga Tour an tan tur chu lawmawm a tih thu sawiin, nakin lawkah Rel-in chhim lam District-te a la thlen thuai dawn thu a sawi bawk.

Larsap chuan India rama khawpui pawimawh tak tak an tlawh tur chu lawmawm a tih thu zirlaite chu hrilhin, India ram hnam ziarang leh nunphung danglam nasat zia an hmuh dawn avangin zirlaite chu midangte hnam ziarang leh nunphungte chika hriat thiam tum turin a chah a. India ram hnam ziarang leh nunphung danglam nasa em em chu kan chakna leh inpumkhatna atana pawimawh tak a nih tih sawiin, zirlaite chu an kalna apiangah hriat belh duh an neihte inthlahrung hauh lova hotute zawt zel turin a chah a. National Integration Tour chuan inunauna leh inpumkhatna a hrin chhuah ngei a beisei thu a sawi bawk.

National Integration Tour 2025-a kalte hi tun thla ni 29-ah rawn kir leh tura ruahman niin an zin chhung hian Guwahati, Amritsar leh Delhi-a hmunhma pawimawh leh hriat hlawh tak takte bakah Sipai hmun pawimawh thenkhatte an tlawh dawn a. He Tour kaltlang hian zirlaite'n India ram an hriatchian lehzual theih nan India Culture, nunphung, thiamna leh ei leh in hrang hrangte hmel-hriat tir tum a ni a; an tawnhriatte chuan zirna lamah pawh a puih ngei beisei a ni.