LADC Inthlanpui neih tur atan Party ten an Candidate tur an puangchhuak tan

Lai Autonomous District Council (LADC) inthlanpui vawi 12-na thla thar December 3-a neih tur atana chuh tumte tana hming pekluh theih hun chu naktuk Nov. 14, 2025 hian a tawp dawn a, nimin khan Party hrang hrang ten an Candidate tur an puang hlawm.

LADC Inthlanpui hi MDC Bial 25-ah neih tura ruahman niin ZPM chuan nimin khan Aizawl-a an Party Office-ah an Candidate turte puangin Bial awm zawng zawng 25 chuh kim an tum a, ZPM atanga MDC nilai pathum chu Candidate tur zingah tel lovin an zingah hian Paithar Bialtu MDC, CEM lo ni tawh V.Zirsanga chu a langsar ber niin, Cheural Bial leh Bungtlang South Bial-ah pawh ZPM, MDC nilai te an ding dawn lo a, ZPM hian an MDC nilai paruk chu an Bial ngai theuh a ding turin an ti a ni. ZPM Candidate te hi an President Lalliansawta chuan puangin, Ccandidate thlang tur hian a hmuna awmte atangin mi 8 awmna Search Committee an din a, LADC-a Bial 25-ah hian din tum leh inbeisei mi 116 zet an awm thu sawiin, Bial pakhatah mi pakhat chauh zel thlan a ngaih avangin Bial chang ve ta lo an awm lo thei lo tih a sawi a, Lai mipuite leh ZPM tan tang tlang a, theihtawp chhuah zel tura sawmin, State sawrkar tha taka thawhpui thei tur leh LADC nghet tha tak din turin an beisei tih a sawi bawk.

MNF Party chuan nimin khan Aizawl-a Mizo Hnam Run-ah LADC Inthlanpui-a MDC Bial 20-a an Candidate turte an puang a, LADC-a MNF in MDC an neihlai mi 11 te chu an Bial ngai theuh ah an ding dawn a, Nominated Seat luahtu MDC Lalthanmawia Colney chu Lawngtlai AOC Bial-a ding tura tih a ni bawk. Hetihlai hian MDC Bial 5- Sangau East, Sangau West, Paithar, M Kawnpui, leh Sekulh Bial a ding turte chu la puang lovin hun remchang hmasa ah puan leh tur a ni ang.

Congress Party pawhin Lawngtlai Bazar Veng-a an Party Office-ah nimin khan Candidate puangin MPCC Vice President Ngunlianchunga'n a thawhkhat nan MDC Bial 25 zinga Bial 10-a an Candidate tur a puang a, tun Sawrkar-a CEM pawh ni tawh C. Lalmuanthanga chu a Bial ngai, South Lungpher-a ding tura tih a ni. Congress Party hian Vawiin hian Candidate puan belh leh an tum nia thudawn a ni.