Labour & Employment Minister inkhawmpui nei

Ni hnih (2) awh tur ‘National Conference of Labour & Employment and Industry Ministers and Secretaries of State/UT Governments’ chu nimin khan New Delhi-a Bharat Mandapam-ah neih tan niin he hun ah hian Mizoram atangin LESDE Minister Lalnghinglova Hmar chu a tel a ni.

India rama Labour & Employment leh Industries Minister leh Secretary te inkhawmpui hi Ministry of Labour & Employment (MoLE) buatsaih niin, Union Labour & Employment Minister Dr. Mansukh Mandaviya leh Union Minister of State Shobha Karandlaje-i ten an telpui a, Mizoram atanga tel LESDE Minister Lalnghinglova Hmar chuan Labour kaihhnawih rampum huap thil sawiho tura State/UT te nen inrawnkhawmna buatsaih a ni chu thil pawimawh tak a ni tih sawiin, “Labour & Employment Ministry hmalakna kaltlanga hna thar kan siam belh rualin hnathawktu tha siam belh a ngai. Chumi tur chuan chak zawka Skill development kalpui tel a ngai a ni.” a ti a. Labour kaihhnawihah State/UT hrang hrang dinhmun a inang lo thei hle tih tarlangin, dan hnuaiah State zawng zawng hrutrual vek lovin mamawhna mila herrem theih dan zawn a pawimawh thu a sawi bawk.

LESDE Minister Lalnghinglova Hmar chuan LESDE Department kaltlangin Mizo thalai engemawzat Japan leh ram dangah hnathawk turin an kal tawh tih pawh sawiin, tawng zir tura Delhi pan a ngai thin chu thil hautak a nih avangin Mizoram chhung emaw, hmar chhak lamah emaw tawng zirna hawng turin rawtna a thlen a. Mizoram-ah Private Placement Agency-te awmze nei zawka kalpui tura sawrkar ruahmanna neih te pawh sawiin, India rampawn mai ni loin ramchhunga mahni State pawna hnathawkte awmze nei leh him zawka enkawlna tura inziahluhna buatsaih tul a tih thu a sawi a, hemi kawnga Labour Ministry hmalakna chu a thlawp thu a sawi bawk.

National Labour Conference hi sawrkar laipui leh state/UT sawrkar te inkara thawhhona tha leh chak zawk a awm theihna’n buatsaih a ni a, Conference ni khatna ah hian MoLE hnuaia Employees’ Provident Fund Organisation (EPFO) in a kalpui mek, kum hnih chhunga hna thar vbc. 3.5 siam belhna tur scheme ‘Pradhan Mantri Viksit Bharat Rozgar Yojana (PM-VBRY)’ kalphung inhrilhfiahna leh sawihona neih a ni a. He scheme hnuaiah hian hnathawk thar (hna la nei ngai lo) tan incentive Rs. 15,000/- dawn theihna leh hnathawk tur rawih belhtu employer te’n incentive an dawn theihna awmin, budget ah cheng vbc. 99,446/- dah a ni. He scheme hian August 1, 2025 leh July 31, 2027 a hna siam tharte a huam ang.

Building and Other Construction Workers (BOCW) te hmasawnna tur pawh he hunah hian ngaihtuah ho niin BOCW hnathawkte tana hna zawnna portal ‘Digital Labour Chowk’ app bakah, online-a Labour Cess pek theihna tur software chu tlangzarh nghal a ni bawk.