Kakichhuah-ah hri leng vang nia hriat ah mi 4 an thi

Lawngtlai District chhunga Kakichhuah khua ah Tuihri ni a hriat vangin mi pali an thih tawh a, nimin khan Lawngtlai atangin Medical Team te chuan Kakichhuah hi an pan nghal a ni.

Kakichhuah khua hi Lawngtlai atanga chhim lam Myanmar ramri a awm niin Tuithumhnar MDC Bial chhunga awm a ni a, Tuithumhnar Bialtu MDC H. Lalmuansanga chuan nimin zing khan Kakichhuah-a hri leng leh chhiatna thleng hi Lawngtlai Bawrhsap Donny Lalruatsanga hrilhin Bawrhsap hian Chief Medical Officer (CMO), Dr.Lalmuanawma Jongte nen rang taka ruahmanna siam nghalin nimin khan Dr. C. Lalzampuii hovin Medical Team te damdawi leh bungraw pawimawh te nen Kakichhuah hi an pan nghal a ni.

Kakichhuah a hri leng avang hian nimin thleng khan mi pali an thi tawh a, November 4 khan Lawmla (75) chu hri leng vang nia hriat hian a boral a, November 9 khan Neda (24) leh Kailaw (48) chu thi ve lehin nimin zing khan Sawla (28) chu a thi ve leh bawk a, heng hri avanga thite hi Khumi hnam ni a hriat an ni. Kakichhuah khawtlang hruaitute chuan hri a darh loh nan mitthi sawngbawl leh vuina pawh mipui nawlpui a punkhawm an remti lova, mi tlawmngai thlanchhuah ten an buaipui a ni. Kakichhuah hi In 130 vel awmna niin Myanmar ramri dep a nih avangin Khumi raltlan engemaw zat an awm tel a, mitthi te hi tualchhung mi pathum leh Raltlan pakhat niin Pum nuamlo, Kawthalo, Luak leh Khawsik te chu an natna lanchhuah dan niin an sawi bawk.

Lawngtlai CMO Dr. Lalmuanawma Jongte chuan Kakichhuah-ah Medical Team an kal thu sawiin, mipuite chi-ai lo turin a chah a. Ei leh in-ah fimkhur tur leh Tui chhuanso dah daih leh chauh in tur leh zun leh ek thlahdah lo turin a chah a, tun dinhmun ah damlo mi 15 atanga 20 vel an awm mek nia an hriat thu sawiin, damlo te chu chuan rang taka damdawi lam thiamte rawn zung zung turin a chah bawk.