Maumual (Chaltlang) ram teh fel atanga Land Pass 456 semchhuahna hun hman a ni

Revenue Department hmalaknaa Maumual (Chaltlang) ram teh fel atanga Land Pass 456 semchhuahna hun chu nimin khan hman niin Land Revenue & Settlement Department Minister B.Lalchhanzova chuan he hun hi khuallian niin a hmanpui a ni.

VOLCOMH, Maumual-a hemi pual-a hun hman ah hian Revenue Minister B. Lalchhanzova chuan thil tha, felfai leh mumal zawk duhna avanga Maumual-a ram neitu leh Revenue Department-a thawktute thawhhona zarah Maumaul ram tehfel hna chu hlawhtling taka kalpui a nih thu a sawi a. Buaina chinfel a nih theih nan ram neitute zingah inphahhnuai hreh lo te, tawlh hnung hreh lo te leh mi inphal tak tak engemaw zah awm chuan hna a tih sawt phah hle thu tarlangin, fakawm a tih thu a sawi a. Ram vanga buaina tam zawk chu ‘duhamna’ vang a nih fo thu sawiin, duhtawk chin hriatna hian buaina tam tak a chinfel phah theih thu a sawi a. Mahni thil neih chu kan hrechiang tur a nih thu leh uluk taka enkawl a pawimawh thu tarlangin, kan ram neihte pawh felfai taka ramri hung thin turin kalkhawmte a chah bawk.

He hunah hian PAMRA President Vanlalbiaa pawhin thusawiin, “Remna avanga lo haw MNF hnam sipaite tana pek Maumual-ah hian sawrkarin LSC-te min pe mahse mahni ram awmna hre lo kan tam hle a, ram buai a tam bawk nen min chinfel sak turin sawrkar vawi tam tak ngen mah ila min tihfel sak thei lova, sum leh pai-a harsatna avangte in tam takin an hralh a ngai ta a ni. Tuna kalphung thar mipui sawrkar, ZPM-in kum hnih chhung leka min chinfel sak thei hi a ropui kan ti a, Peace Accord MNF Returnee Association member-te min hmangaihtu Pu Lalduhoma, Chief Minister leh Pu B.Lalchhanzova,” a ti.

Chaltlang ram Maumual-ah hian House Pass 829 bawr vel atangin Govt. Land Bank leh Land Lease engemawzat a awm a, mimal ram 740 bawr vel awmin ram buai a tam em avangin ram nei tan pawh kutthlak hleih theih a ni lova, Revenue Minister B. Lalchhanzova hmalaknain re-survey neih a ni a, Department lamin theihtawpa hma an lak zui hnuah chinfel a ni ta a. Land Revenue & Settlement Department chuan a hmunah khawl nen thutchilhin LSC awlsam chi leh rintlak zawk tur Record of Rights (RoR) an semchhuak a ni.

Nimin-a he hun hman ah hian Revenue Department Director R. Lalthazuala chuan report pein Maumual ram teh that hna hi May ni 23, 2022 atang khan kalpui tan a ni a. Survey nan hian kawng km 11.65-a thui laih niin kawng laihna leh Survey hna thawh nan hian Rs. 41,37,872 hman a ni a. Ram 831 teh that niin Land Pass 456 pekchhuah theih a peihfel a ni a. Land Lease 13 leh Land Bank 61 tehfel a ni bawk.