Hnamdang ten Mizo kut an thlak MZP in pawi an ti

Mizo Zirlai Pawl (MZP) General Hqrs. chuan Mizoram chhungah Mizo ten hnamdang kut an tuar leh thin chu pawi an tih thu sawiin, Board Exam result tha duh luat avanga Zirlai hnufual dropout an awm thin chu tha lo an tih thu an sawi bawk.

MZP General Hqrs. chuan nimin khan Executive Committee Meeting neiin Chawngte ‘P’ a Mizo leh Chakma inkhelhna a buaina chhuak ah Mizo ten Chakma kut an tuar chu an a duh lo takzet tih sawiin, Mizoram chhungah Mizo ten hnamdang kut an tuar leh thin chu pawi an tih thu leh Mizoram chhunga hnamdang chengte pawh fimkhur tur leh a ram neitu Mizote chu zah turin an hriattir tih an sawi a. Chawngte ‘P’ a thilthleng chungchang hi nimin vek khan Mizoram Chakma Student Union-te pawh an sawipui nghal a ni.

Hei bakah hian MZP chuan School thenkhat Board exam result tha duh luat avanga Zirlai hnufual dropout an awm thin chu tha an tih loh thu sawiin, Zirlai hnufual, thiamtheilo leh chhawmdawl ngai tak takte chhawmdawla kaihruaitu tur zawk ten School result tha duhna vang ringawta Zirlaite hma hun chhe tur ngaihtuah pui miah lova an hnawtchhuak thin leh School dang atanga Board Exam hmachhawn tura sawipui leh fuih an awm thin chu pawi an ti takzet tih a sawi a. Hetiang ang harsatna tawk mek zirlaite chu MZP-ah in report tura ngenin, Zirlaite harsatna chinfel pui turin an inpeih reng tih an sawi bakah hetiang ang harsatna hi Zirlaiten tawk tawh lo se a duh thu an sawi a ni.

MZP chuan Zirlai harsate tanpuina tur an buatsaih, Students’ Aid Fund chu nimin khan Guideline pharhin an pawm a, Students’ Aid Fund hi Mizo zirlaite, sum leh pai harsatna avanga zirna chhunzawm theilo te chhawmdawlna tur niin December 10, 2025 (Nilaini) khian Chief Minister hova tlangzarh tum a ni.