AI leh Technology mila zirna herrem leh mahni intuaihriam a ngaih thu Minister in a sawi

School Education Minister Dr. Vanlalthlana chuan Artificial Intelligence (AI) leh technology hmang thiam chu an dinchan dawn avangin hemi mila zirna herrem a, mahni intuaihriam a ngaih thu a sawi.

State Council of Educational Research & Training (SCERT) buatsaih ni hnih (2) awh tur ‘EduTech Fest & Career Fair 2025’ hawnna nimin-a SCERT Courtyard-a neih a hmanpuina ah Education Minister Dr. Vanlalthlana chuan Technology kan hman tangkai thiam chuan ram pumin hma a sawn dawn tih sawiin, “AI leh technology hmang thiam chu an dinchan dawn avangin hemi mila zirna her rem a, mahni intuaihriam a ngai,” a ti a. World Economic Forum chhut dan chuan kum 2030-ah AI chuan khawvel pumah hna maktaduai 85 a luahlan anga, hna thar maktaduai 97 vel a siam dawn tih pawh sawiin, zirlai kalkhawmte chu AI nen hna an inchuh dawn avangin tunlai mil thiamna – Digital Literacy, Communication Skills, Financial Literacy leh Tourism thang zel dawnsawn nan Social Skills leh Hospitality lam bawh zel turin a fuih a. Mahni kutkawiha ding thei, mi rawih ni lova mi ruaitu, hna zawngtu ni lova hna siamtu ni tura inpuahchah thiam zel turin zirlaite chahin, sawrkar pawhin chutianga kaihruai thei turin hma lak zel a tum a ni, a ti bawk.

Hei bakah hian Education Minister chuan kan literacy rate sang mah se thiamna in a umzui loh chuan awmzia a awm loh thu pawh sawiin, PARAKH (Performance Assessment, Review, and Analysis of Knowledge for Holistic Development) exam-ah Mizo zirlaite’n State danga an zir rualpuite an tluk loh hle avangin tan lak a ngaih thu a sawi a. Thu a sawi zawh hnu hian EduTech Fest & Career Fair 2025 chu hawngin Lalhruaitluanga lehkhabu ziah, ‘Zirna Lamtluang: Roadmap to Higher Education’ copy 15 chu he Fest chhunga sem turin SCERT hnenah a hlan nghal bawk a ni.

EduTech Fest & Career Fair 2025 hawnna hun hi SCERT Director Caroline Zoramthangi chuan kaihruaiin MYC Chairman Malsawmzuala Ralte chu khual zahawm niin thu a sawi a, SCERT Joint Director Dr. Lalduhawmi Thomte chuan report pein, kumin hi EduTech Fest leh Career Fair thlunzawma hman a nih vawi khatna a ni a. SCERT ICT Cell chuan PM e-Vidya channel pahnih – Zirna Kailawn leh Zirna Lamtluang chu chhun zanin a chhuah thin a. Educational and Vocational Guidance and Counselling Cell hnuaiah 6-Month Course in Career Counselling leh 10-Day Training Programme in Guidance and Counselling kalpui thin a ni bawk. EduTech Fest & Career Fair 2025 chu National Education Policy 2020-in a ngaihpawimawh pahnih - Guidance and Counselling leh Digital Education-te nen a inzulzui bawk a ni. EduTech Fest & Career Fair 2025-ah hian Stall 22 a awm a ni.