YMA hi chuan hmeithai leh fahrah te, chhuanchhamte lam i hawi tlat ang u - Chief Minister
Serchhip Bialtu MLA leh Chief Minister Lalduhoma chuan nimin khan a Bial chhung, Thenzawl Vengthlang Branch YMA kum 25-na (Silver Jubilee) lawmna hun Victoria English School-a buatsaih chu khuallian nia hmanpuiin kan ramah Missionary an lo luh khan rinna thar an rawn keng ni satliah lovin Biak In leh Inkhawm te, nitin School an rawn kenglut tel tih a sawi a. “Kristian an pung deuh deuh a. Zirna kan ngaihlu tial tial bawk a, Zawlbuk kha a rawn hliahkhuh tan ta a. Kum 1925 a lo herchhuah meuh chuan mumal taka Zawlbuk kalpui thei khua an awm bar tawh lo. Zawlbuk ber a awm tak lovah chuan Missionary te khan Zawlbuk pawimawhna chhawmnung zel thei institution din tulin an hria a. Kum 1935 June thla tirah Pi Zaii In-ah inrawnkhawmna an nei a, June ni 15-ah Young Lushai Association an din ta a. Zawlbuk-a thalai riahkhawmtir lam kalsanin, mahni In-a riaka mahni pawipang khawih chunga, pawl (Association) kaltlanga hmalakna a lo piang ta a ni,” a ti.
YMA chuan Zawlbuk thatna leh tangkaina chhawmin, Kristianna pensan lovin Zonun ze mawi vawnhim leh thangtharte hnena hlan chhawn hna te, hnamzia leh Culture venhim te, thu leh hla, lam, rimawi leh hmunhma hlui vawnhim te a kalpui tih Chief Minister chuan sawiin, “Vawii na mite pawhin chu chu kan phak tawka kan kalpui ve zel a tul a ni,” a ti a. Thenzawl Vengthlang Branch pawh hemi kawngah hian Meichher chhi engtu ni thar turin a chah a. “YMA chu tanpui ngaite tanpuitu a ni tih hi Mizo mipuite thinlungah a cham reng a. Tunlai khawtlang nunah hian thangtharte hian tanpui ngaite hnuchhawn a, kan hmaizah zawngte lam chauh kan bengkhawn mai ang tih te a hlauhawm tawh a ni. YMA hi chuan hmeithai leh fahrah te, chhuanchhamte lam hi i hawi tlat ang u,” tiin a chah bawk.
He hunah hian Chief Minister chuan Then-zawl Vengthlang YMA member leh khawtlang mipuite Jubilee chibai bukin, Branch lo kaihruai tawhtute a fak a, hruaitute pawh kum tam tak lo la kal leh tur tana hmathlir thui tak nei chunga kaihruai tura chahin, “Thenzawl Peace City din tum a chak taka hmalak mek a ni a, hei hian nasa takin kan khaw hmelhmang a rawn thlak dawn a. Mipuite inhawng taka kan inbuatsaih a ngai dawn tih i hre lawk ang u,” a ti bawk.
Thenzawl Vengthlang Branch YMA kum 25 tlin lawmna hun hi Branch President Henry Lalthanpuia chuan kaihruaiin Report ngaihthlak a nih bakah hruaitu hlui chawimawina hun hman a ni a, an Branch OB lo ni tawh te chawimawina leh an Branch huamchhunga infiamna lama mi hmingthate chawimawina an nei bawk.
Thenzawl Vengthlang Branch YMA hi kum 2000 a din a ni a, a hma chuan Thenzawl Bazar Branch hnuaia Section pakhat ni thinin, tunah hian Branch chhungah In ding 302 awmin an zinga 290 chu luah lai a ni a, mihring 1450 an cheng mek a, an zinga 780 chu hmeichhia niin YMA member mi 925 an awm mek bawk a ni.
Thenzawl hi Lal hmingthang Bengkhuaia'n kum 1863 kum-a a din a ni a, aman a thut loh lai pawhin a faten an thut zui zel a. Lal hnuhnung ber chu a tupa Lalngurchhina niin Lal Bengkhuai hi Thenzawl Bungmual-a a chenna In-ah kum 1879 khan a thi a, a thlan pawh a In bul mai ah hian a awm a ni.
Chief Minister hi a Bial chhunga awm zui zelin Vawiin hian Buangpui Branch YMA ten kum 50 an tlinna, Golden Jubilee lawmna hun chu khuallian niin a hmanpui leh nghal dawn bawk a ni.