Sawhthing man chingpen nia sawi ah FIR thehlut

Social activist Vanramchhuangi chuan Agriculture Minister-in Sawhthing leina man chingpen cheng vbc. 4/5 vel a awm nia a sawi tualchhung chanchinbu leh Social Media hrang hranga lang chungchangah nimin khan Anti-Corruption Bureau (ACB)-ah FIR a thehlut a, Sawhthing leina sum ti chingpentute chhui chhuak ngei turin ACB hi a ngen a ni.

Vanramchhuangi hian FIR a theh-luhah hian October ni 10 leh 11, 2025-a tual-chhung chanchinbu leh Social Media site hrang hrangah Sawhthing leina sum tihchingpen a awm thu Agriculture Minister-in a sawi tih a tarlang a; hei hi thil serious tak a nih avangin mipui sum tam tak tichingpentute chu tute pawh ni se dan anga chhui a, an phutawk hremna an hmuh ngei theih nan FIR chu a thehluh thu a tarlang a ni.

Mipui sum tihchingpenna lian tak thleng chungchang Minister meuhin a puanzar hnu pawha chhui zui a ni lo leh thubuai siamsak an la awm lo chu thil zahthlak tak a nih thu pawh Vanram-chhuangi chuan a FIR thehluhah hian a tarlang a; “He thil thleng rapthlak tak hi ACB in hma in lak loh chuan khua leh tuite'n sawrkarah rinna nghah harsa kan ti zual sawt anga, sawrkar leh mipui inkar khi chat sa a zau belh ang a, kawng tinrengah Law & Order kenkawh a harsat phah ang. Chuvangin a rang thei ang bera mipui sum tichingpentute chhuia hrem an nih ngei theih nana man chhuak ngei turin ka ngen nawn leh a che,” a ti bawk.