Rashtriya Poshan Maah 2025 kharna leh ICDS kum 50 tlin lawmna hun buatsaih a ni

Zonuna Kawlni /

September 16 atanga hman Rashtriya Poshan Maah (National Nutrition Month), 2025 kharna leh Integrated Child Development Scheme (ICDS) kum 50 tlin lawmna chu nimin khan Aijal Club Park-ah neih a ni.

Directorate of Women & Child Development bultuma he hun hman hi VL. Zaithanzama MLA chuan hmanpuiin Poshan Maah-in a thupui ken tel hrang hrangte uar taka inzirtir kawnga a kaihhnawih Department-te hmalakna chu lawmawm a tih thu a sawi a. Department-te chu theihtawpa tan la chhunzawm zel turin a fuih a. ICDS in kum 50 a tling ta chu a lawmpui thu sawiin, hriselna kawnga Mizoram tana ICDS hnathawh chu lawmawm a tih thu a sawi a. a thawk tawhte leh la thawk mekte thawhrimna chu fakawm a tih thu sawiin, ICDS–a thawktute chu theihtawpa tang zel turin a fuih bawk a ni.

Rashtriya Poshan Maah pual hian he huna Khual zahawm Cooperation Department-a Commissioner & Secretary Udit Prakash Rai chuan Aizawl Urban ICDS Project leh Tlangnuam ICDS Project hnuaia naupang Anganwadi Centre kal tha leh kal chhuak mi 10 te hnenah lawmpuina Vidhyarambn Certificate a hlan a. District Level leh ICDS Project Level-a titha zualte hnenah lawmman sem nghal niin SWW&CS-a Commissioner & Secretary Lalzarmawii IAS chuan ICDS Project Level Award hi a hlan a ni.

Rashtriya Poshan Maah 2025 hman chhung hian thupui chi hrang hrang hmanga hmalakna kalpui niin heng thupui hmanga District Level-a Poshan Maah 2025 hmang tha leh ICDS kum 50 tlin lawmna puala intihsiakna te buatsaih a ni a. District Level-a hmang tha zual lawmman semah, Siaha District chuan pakhatna lawmman dawngin, Serchhip District leh Kolasib District-ten pahnihna leh pathumna lawmman an dawng a. ICDS Project Level Award semah West Phaileng ICDS Project chuan lawmman pakhatna dawngin, Bilkhawthlir ICDS Project leh Thingsulthliah ICDS Project-ten an dawt a ni. Rashtriya Poshan Mah 2025 kharna hunah hian Dr. Lalhruaitluangi Chhangte, Deputy Director (ICDS) chuan a lem nena entirin Poshan Maah 2025 thlirletna hun a hmang a, Sailopari, Joint Director Women & Child Development chuan lawmthu sawiin hun hi a khar a ni.

Chawhnu lamah ICDS kum 50 tlinna lawm chhunzawm nghal a ni a, Women & Child Development-a Director Zoramthangi Chhangte chuan ICDS chungchang sawi zauin, Mizoram Anganwadi Reporting Tools (MART) Mizoram puma Anganwadi hrang hrang bakah Project hrang hrangin Data dahthatna leh lakkhawmna atana an hman tur software chu a tlangzarh nghal a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Hmeithai thla la tur Scooter atanga tlain a boral

Zonuna Kawlni /
Image
New Serchhip Kikawn, Agriculture Complex panna kawng-a mahni a khawsa Pi Lalnuntluangi @ Pi Tluangi (70) W/o Raldokunga (L) chu Vawiin (May 18, 2026) khan Scooter atanga tlain a boral a, a ruang hi Aizawl Tlangnuam-a a fanu ten an la dawn a ni. Thudawn danin Pi Tluangi hi hmeithai, mahni a khawsa niin ‘ni 100 inhlawhna’ (MGNREGS) hnuaia inhlawhna ah Vawiin tlai khan thla la tura kalin an Veng-a pa pakhat in Scooter-ah a phur a, Govt. Serchhip College bulah Scooter atang hian tlain a boral zui ta a ni. Scooter atanga a tlak hun hi dar 2:00 vel niin dar 4:00 velah a boral a ni.
Kimchang zawkin »

June 18-ah Mizoram Rajya Sabha MP thlanna neih a ni dawn

Zonuna Kawlni /
Image
Mizoram in Rajya Sabha-a Seat pakhat a neih luah tur thlanna chu June 18, 2026 khian neih a ni dawn a, hemi ni hian State 10-a Rajya Sabha MP tur mi 24 thlanna neih a ni dawn a ni. Mizoram hian Rajya Sabha-ah Seat pakhat nei mekin tuna Rajya Sabha MP nilai K. Vanlalvena hun hi July 19, 2026-ah a tawp dawn a. He inthlanna chuh tumte tan hian June 8, 2026 thlengin hming pekluh theih a ni ang.
Kimchang zawkin »