Mamit-a tlawmngai pawl leh lirthei a eizawng ten kawngpui hrang hrang an dang tan

Mamit-a Tlawmngai pawl hrang hrangte leh lirthei hmanga eizawngtute chuan kawngpui chhe lutuk thawmthat a nih theihna tura sawrkar kar nana lirthei lut leh chhuak dang tura ruahmanna an siam angin nimin zing dar 7:00 atang khan Mamit pawhtu kawngpui hrang hrang an dang tan ta.

Mamit-a All NGO leh Commercial Vehicle Association te chuan Mamit kawngpui chu a chhiat em avang leh sawrkarin an ngaihthah ni a sawiin, Mamit District tana châk lakna leh veivahna Motor kawngpui pawimawh Mamit to Aizawl, Mamit to Bairabi leh Mamit to Zawlnuam te chu lirthei eng chi tan pawh kal hleih theih loh khawpa chhia chu pawi an tih thu leh chhuanlam ho te te siam tawh lova a rang thei ang bera siam tha turin an lo ngen tawh a, amaherawh chu hmalakna mumal leh beisei anga hnathawh a awm lo nia hriain nimin zing atang khan kawngpui hi an dang tan ta a ni.

Mamit-a All NGO leh Commercial Vehicle Association ten kawngpui an an tum chung-chang ah hian nizan hmasa khan Bawrhsap K. Laltlawmlova hovin thutkhawm neih a ni a, he hunah hian PWD Engineer-in-Chief H. Zoramliana chuan he kawngpui thawmthat nan hian hma an la nghal dawn tih a sawi a. NH-44A kawng siamthat nan cheng vbc. 11 hmuh a nih thu leh kawng hlui siamthatna tur pawisa pawh hmuh a nih thu bakah NH-44A kawng siamna tur cheng vbc. 170 pawh sanction fel a nih tawh bakah Sawrkar Laipui-ah chak zawka kalpui a nih theihna turin nawr mek zel a nih thu a sawi a. Mipuite tana harsatna siam lo a, kawngpui dan chu titawp a hmalakna ngaichang turin a ngen bawk a ni.

Hetihlai hian All NGOs & Commercial Vehicle Association-a Chairman Vanlalremruata chuan mipui harsatna siam zawnga hmalakna kalpui chu an tum hrim hrim a nih loh thu sawiin, hmalakna hmuh an beisei thu a sawi thung a ni.