Chief Minister in Serchhip Zuangleng-a Changel Kawr sawngbawlna a hawng
Ministry of DoNER PM-DevINE sum hmanga North East Centre for Technology Application and Reach (NECTAR) ten an din Changel Kawr sawngbawlna Common Facility Centre, (NECTAR Livelihood Improvement Project – A Value Chain on Utilization of Banana Pseudostem for Value-Added Products) hi Serchhip leh Thenzawl inkara Zuangleng ram-ah bun niin a hawnna Inkhawm hi Serchhip Bawrhsap Pisapui Hall-ah neih a ni a, he hunah hian Chief Minister Lalduhoma chuan Zuangleng ram leh a chhehvelah hian Changel a tam thu leh Khumtung leh a chhehvel khuaah Balhla chingtu tam tak an awm bawk thu sawiin, heng te behchhan deuh hian NECTAR lamten Changel Kawr sawngbawlna an din thu a sawi a. Helai-a ram nei, Changel leh Balhla kawr paih mai mai thin ten an hnawm kha sum-ah an chantir theih dawn tak thu a sawi a. Minister of DoNER chungah leh hnathawktu NECTAR te hmalakna ah Chief Minister chuan lawmthu sawiin, “He Unit enkawltu tura thlan Implementing Agency APRINS te chu tha taka kalpui turin kan beisei dawn a, kan tum ang ngeia kan kuthnathawktute tana tangkai taka an kalpui kan duh a ni,” a ti.
Nimin-a Changel kawr sawngbawlna hmun hawnna hunah hian Agriculture Minister PC. Vanlalruata leh NEC Secretary Satinder Kumar Bhalla te chu khual zahawm niin Agriculture Minister PC. Vanlalruata chuan Ministry of DoNER chungah lawmthu a sawi a. Mizoramin kan la hmelhriat ngai vak loh Changel kawr sawngbawlna Serchhip District-in a nei chu an lawm thu leh mi tam takin an tangkaipui a rin thu a sawi bawk.
Nimin-a hawn tak Common Facility Centre hi Changel kawr atanga hrui siamna, Kut-a siam paper siamna, Vermicompost siamna leh Savun thlakna, Vegan Leather an tih mai siamchhuah theihna tura duan ni a. A buaipuitu NECTAR hi Department of Science & Technology hnuaia Autonomous Institution an ni a. Zuangleng CFC enkawl tur hian APRINS Guwahati te chu thlan an ni. NECTAR hian India hmarchhak ah Technology thar leh tunlai zawk hmanga thingtlang loneitute tanpuina hna an thawk nual a, Mizoram-ah pawh hmalakna tam tham tak an nei a ni.
Serchhip Bawrhsap Pisapui Hall-a he Centr thare hawnna hunah hian Bawrhsap Paul L. Khuma chuan inlawmna thu sawiin, Dr. Collin Z. Renthlei, Technical Advisor, NECTAR chuan lawmthu sawiin a hawnna inkhawm a khar a. Hemi hnu hian Chief Minister leh sawrkar mi pawimawh dang te hian Zuangleng phai-a he khawl bunna hmun hi tlawhin an hnathawh dan te a hmunah an thlirpui bawk a, khawl enkawltu ten a hnathawh dan an hrilhfiah bawk a ni.