Prime Minister in PM DDKY Project tlangzarhin Mizoram atangin lo zawm ve a ni

Prime Minister Narendra Modi chuan ram puma loneitute hamthatna tur Scheme thar pahnih chu Inrinni khan a tlangzarh a, he hun hi Mizoram atangin Internet hmanga lo chhim a ni.

Prime Minister-in heng Scheme pahnih a tlangzarh tak te hi Scheme Pradhan Mantri Dhan Dhaanya Krishi Yojana (PM-DDKY) leh Mission for Aatmanirbhara in Pulse te niin NASC Complex, Pusa, New Delhi-ah a hawng a, Prime Minister chuan PM Dhan Dhaanya Krishi Yojana leh Mission for Aatmanirbhara in Pulses te chuan ramchhunga loneitu maktaduai chuangte nun a thlak danglam dawn a ni, a ti a. Heng hmalakna pahnih ah te hian a vaiin cheng vbc. 35,000 hman a ni anga, PM Dhan Dhaanya Krishi Yojana-ah hian cheng vbc. 24,000 chuang ruahman niin Loneitute thlai thar tihpun te, tumkhata thlai chi hrang tam zawk chin theihna tura hmalakna leh loneih dan tlo zawk kalpuina tur a ni a. Self Reliance in Pulses Mission hi Be lam chi a intodelhna tur hmalakna niin cheng vbc. 11,000 ruahman a ni bawk.

PM-DDKY chu kumin July ni 16 khan Union Cabinet chuan pawmin loneitute tana duan a ni a. India ram State hrang hrangah Agriculture chawikanna hmun tur District 100 thlanchhuah niin chung atan chuan kum ruk (6) chhung, kumtin cheng vbc 24,000 dah a ni a. ‘Saturation based Convergence’ niin Ministry hrang hrang 11 hnuaia Scheme awmsa 36 te chu he scheme tihhlawhtlin nan hian hman tangkai an ni ang.

Inrinni-a Prime Minister hova hun hman hi ramchhung hmun hrang hrang atanga lo zawm ve niin Aizawl-ah chuan Agriculture & Farmers’ Welfare Department Secretary Ramdinliani hovin Agriculture & Farmers Welfare Department leh Horticulture Department a Senior officer-te'n an chhim a, KVK Kolasib chuan Line Department leh loneitute nen an lo zawm a, Siaha KVK pawhin khawchhunga kuthnathawktute leh tlawmngai pawlte nen lo zawmin he project thiltum leh thatna te chu kalkhawmte hnenah hrilhfiah nghal an ni a. KVK Lunglei District, Hnahthial huaihawtin District Agriculture Officer (DAO), District Horticulture Officer (DHO) , School of Agricultural Sciences (SAS) Principal leh VCP South-III Hnahthial ten he hun hi an lo zawm bawk a ni.

Prime Minister hian Agriculture Infrastructure Fund (AIF) hnuaia Project hrang hrang 1034- Animal Husbandry, Fishery leh Food processing Industries atana hmasawnna ruhrel hrang hrang siam cheng vbc. 5450 hu chu hman theih turin a hawng bawk a ni. He programme-a tel tur hian Mamit District atangin Agriculture Department Officer pakhat; Subject Matter Specialist (SMS), KVK, Mamit pakhat; National Mission on Natural Farming Scheme hnuaia Natural Farmer pakhat leh Farmer producer Company aiawh pakhat tirh an ni bawk.