Mi 200 hnenah Loan vbc. 14.39 pe tawh

Mizoram sawrkar Flagship programme, Bana Kaih (Handholding) Scheme Phase-I hnuaia Loan Component diltu zinga Progress partner atana thlan mi 200 hnenah Bank-ten Loan an pe tawh a, mi 200 hnena Loan pek tawh hi a vaiin cheng vbc. 14.39 a tling.

Handholding Scheme Phase-I ah hian Loan Component dilna lut 11,439 zingah 702 chu pawm niin Progress Partner atan thlan an ni a; kar kalta Zirtawpni, October ni 10, 2025 thleng khan heng mi 702 zinga mi 200 hnenah hian Handholding Scheme partner Bank - Mizoram Rural Bank (MRB), Mizoram Cooperative Apex Bank (MCAB) leh State Bank of India (SBI)-ten Loan Rs. 14,39,70,600 an pe tawh a ni. Handholding Scheme partner Bank pathum zinga Loan pe tam ber Mizoram Rural Bank (MRB) chuan mi 151 hnenah Loan an pe tawh a; State Bank of India (SBI)-in mi 40 leh Mizoram Cooperative Apex Bank (MCAB)-in mi 9 hnenah an pe tawh bawk a ni.

Mizoram State Policy Coordination Committee (MSPCC) hotute hnen atanga Akashvani thudawn danin, thlahlui September ni 19-a tlangzarh tak Handholding Scheme Phase-II kalpui mekah ni 22 chhung, kar kaltla Ningani thleng khan Progress partner dilna 20,050 a lut tawh a. Ni 22 chhunga Handholding Scheme Phase-II atana Progress partner dilna hi Loan Component-ah 109 leh CM Special Package-ah 19,941 a ni a; MSPCC hotute chuan Phase-II a dilna lut zingah pawm an la neih rih loh thu sawiin, dilna lutte hi an endik chhoh mek thu an sawi a ni.