Direct Recruitment-ah MPSC in zawhna siam dawn

Mizoram Sawrkar chuan Mizoram Public Service Commission (MPSC) hnathawh thin siam belhin, Mizoram Sawrkar Department hnuaia direct recruitment hmanga hna lak reng rengah MPSC in zawhna (question) set vek turin MPSC Limitation of functions a siam tha a. ‘The Mizoram Public Service Commission (Limitation of functions) (Amendment) regulations, 2025 chu Gazette-ah September 24, 2025 khan tihchhuah a ni bawk.

    Tuna kalphung dinglai ah chuan Pay Level-05 leh a hnuailam chu Department-in question set leh recruitment an khawih thin a. MPSC hian Pay Level-06 leh a chunglam a khawih thung a. Sawrkar-in ruahmanna thar a siam dan chuan Sawrkar department hnuaia Direct Recruitment-a hna lak tur reng reng ah chuan, Department-in a khawih chinah pawh question chu MPSC chauh in an set tawh dawn a. Hei hi Department ten MPSC hnenah an thlen thin ang tih a ni. Department-in mahni in question a set theih tawh lova, question set tura midang rawih a remchang tawh lo a ni. Question set bakah hian exam kaihhnawih dang Answer Scripts endik leh a tul dangte ah MPSC rawn hmasa chungin Department ten MPSC hi hna lak chungchangah an puihna an dil thei bawk ang tih a ni bawk.